EL MOLÍN DEL TIEMPU. El mes del samartinu

El día primeiru d’esti mes yera día de rituales pa los nuesos muertos. Mientras asomaba la nieve polos altos, faíase una alcordanza de la xente de la familia que nos espera no camposantu. Tien fuercia anguanu esta celebración, pero tuviera muita más entovía no pasáu, con mui bien de creencias ya ritos.

Por exemplu, alcuérdome you de vere calabazas afuracadas con l.lume dientro: aquel.las celebraciones fuenon sumiéndose no tiempu, anque agora vuelven a nós revitalizadas pol ‘power’ que chega del outru l.lau de la mar, en forma de Halloween. Asina qu’andamos yá pol penúltimu mes del anu. Anque l’outuenu chegara en setiembre, yía agora cuando lu sentimos dafeitu.

Van las fuechas de los árboles poniéndose más mariel.las ya escuras, mientras l’aire las revuelve con fuercia creciente d’acá p’al.lá. Siguen menguando los días ya tamién la l.luz. Esti mes, no puestu once del calendariu nuesu, yera’l novenu del romanu ya por eso’l sou nome l.latinu yía ‘november’. Na riestra de meses del anuariu agrícola de San Isidoro apaez ‘november’ decoráu con un gochín del que tien manu un paisanu pola ourecha mientras se pon a matalu.

Porque si por outubre la xente trabachaba pa engordar los gochos de casa, agora, al chegar San Martín, entámase la matanza. Esti santu, San Martín de Tours, celébrase’l día once del mes, anque van desplazándose los samartinos pa más contra l’iviernu, buscando la xelada ya la friura. Igual yía porque los outuenos son más blandos qu’antias. El ‘samartín’ o ‘samartinu’ yera un l.labor muitu importante pal campesináu.

El gochu daba proteína ya sabores bien ricos pa chenar las bocas ya tapar la fame, compañera fiel del mundu rural tradicional. Xeneralmente yía un home’l matachín, pero solía ya suel ser la mucher la que más trabacha conos gochos ya nos l.labores de la matanza, l.lavando ya desurdiendo las tripas ya fayendo los embutidos. Gracias a estos eventos yera quien la casa a faere ya a guardare xamones, l.lacones, chourizos, morciel.las ya muitos outros productos, porque del gochín aprovéitase tou. La cultura del gochu vien de cuantayá, chéganos de la fondura del neolíticu.

You viví de pequenu l’espíritu festivu del samartinu, una celebración ritual de tola familia. Pero aquel.la al.legría yía difícil d’entender güei: va cambiando muitu la visión de las cousas ya impónse una nueva moralidá no tocante al consumu ya a la visión de los animales. Outramiente, tamos no tiempu de poner las castañas no tambor ya magostar. Ya magostar tamién tien un aquel de celebración coleutiva. Porque l’iviernu vien a nós ya préstanos calecer. Calecer xunto al l.lume.