Marie Kondo, los l.libros ya la felicidá

Yá van cinco branos que Marie Kondo espublizóu n’España las suas obras pa ordenar la casa. L.logróu muita fama ya agora Kondo yía protagonista na TV. ¿Qué diz esta mucher? Diznos que los l.libros puen estorbanos ya que, entós, pol nuesu bien, igual convién quitalos.

Nas viviendas de los pueblos nun había l.libros, anque dalguna buela, como la mía, que se chamaba Felicidá, tenía l’arca chena de novelas, ventanos al mundu. Namás había estantes de l.libros pa los aristócratas ya la burguesía, hasta que chegóu la economía de mercáu ya entranon los l.libros nos salones de las familias. Venían partidas de mercaderes a los pueblos ya fartábanse vendiendo diccionarios a la xente: dalgunas veces “paraban”, o seya, quedaban na pousada del pueblu unos días pa faer un gran negociu de casa en casa.

Pero agora hai l.libros a esgaya, sobran. Ya Marie Kondo quier solucionar esti problema. El cristianismu semóu el conceutu de culpa, mientras que na bril.lante, complexa ya sabia cultura xaponesa manda l’equilibriu sobre la culpabilidá. Kondo estudióu nuna universidá cristiana, pero cultiva esti matiz: nun te sientas culpable por ordenar la casa, anque tires cousas queridas.

La casa yía un mapa de la mente. Si la tua casa ta desordenada, la tua vida yía un caos. El métodu KonMari gana porque ofrez la felicidá: ordena ya, entós, serás feliz. Vesla en “Netflix” de casa en casa ya’l sou programa paez una sesión d’autoayuda. La felicidá consiste en plegar bien la roupa interior. Tanto escribir los filósofos griegos páxinas ya páxinas pa ser felices ya resulta que tenemos soluciones más intelixentes ya elementales: por exemplu, tirar esos l.libros de los filósofos al contenedor.

Reconozo que Marie Kondo paezme simpática. De rapaza, mientras los outros nenos xugaban, el.la furgaba nos caxones pa colocalos. Na escuela aproveitaba’l recréu pa organizar los l.libros. El.la manda dexar namás lo que te fai falta ya tirar los oxetos sentimentales porque, en realidá, diz, nun te faen feliz. ¿Qué faere con esi l.libru gordu del que namás te gusta una páxina? Marie Kondo contóunos un día la sua interesante evolución inteleutual en cuantas a esa cuestión: antias tomaba notas, pero agora fai una cosa mechor, que yía arrincar la páxina, guardala nun ficheru ya mandar el l.libru pa la basura.

Marie Kondo tien calculáu cuántas obras hai que tener en casa: trenta. Más de trenta son un peligru ya puen afogate. La mia buela, que se chamaba Felicidá, tenía unos cuarenta l.libros nel arca. Imaxino a Marie Kondo regresar no tiempu ya plantase delantre d’el.la diciendo:

- “¡Felicidá, sóbrante diez!”