El branín de San Martín

Diz un reflán popular: «El branín de San Martín tien que venir». Pero más bien tamos acostumaos, cuando chega’l primeiru de noviembre ya vemos «la nieve polos altos», a pensar que’l fríu chena las nuesas vidas.

Lo que xeneralmente prestóu siempres por noviembre yera poner las castañas no tambor p’asalas ya comelas cerca del l.lume. Esa yía la imaxe del outuenu nel penúltimu mes del anu.

Pero nesti 2015 paez que resucita con muita fuerza la teoría del branín de San Martín. Chegóu’l buen tiempu ya talmente paez que tamos nun auténticu branu, con calor ya sol.

Resulta que yá pasóu’l día de San Martín, el día 11. Ya ¿cuála yía la figura que guarda la memoria popular del día 11 de noviembre? Lo que guarda la memoria coleutiva yía’l tiempu de la matanza de los gochos, conos sonidos propios d’aquel.los memoriales rituales ya cono aire festivu de las familias qu’entamaban los l.labores pa chenar la bodega d’alimentos pal l.largu iviernu.

La matanza faíase nel mes de noviembre porque’l fríu garantizaba la conservación de la reserva alimentaria de la familia. Pero ¿podemos faer na nuesa imaxinación una estampa onde’l matachín ya los qu’ayudan a matar el gochu tienen roupa de branu? Non, paez incongruente dafeitu. Cousas del cambiu del clima. O cousas de que, como siempres se dixo, «el tiempu anda l.loucu».