el día de la candelaria

Entovía hai xente que s’alcuerda de la Cuarentena. Según esta costume, la mucher ya’l fichu que pariera podían entrar na ilesia a los cuarenta días del nacimientu. Mientras, la mucher yera impura ya nun podía entrar nos templos. Faíase, entós, a los cuarenta días la ceremonia de presentación ya de purificación.

Los cuarenta días dende’l día 25 de diciembre cúmplense mañana, día 2 de febreiru, día de la Candelaria, cuando toca la presentación de Xesús ya María nel templu.

¿Por qué las Candelas? ¿Por quéi? La procesión de las velas yera costume na Roma antigua, nas fiestas Lupercales, buscando la fertilidá a la mitá de febreiru. Yera ésta una celebración tan enraigonada na sociedá que cuando’l cristianismu gobernóu Roma los papas nun yeran pa desaniciar aquel.los ritos.

La solución alcontróula la Ilesia, como siempres, cristianizando la procesión de velas por San Valentín. Más tarde xuníuse esti ritual al de la Purificación de María ya asina chegóu a nós esta fiesta que marca’l calandariu popular.

Igual la Candelaria que San Blas, que se celebra’l día siguiente, tiénense como avisu de la primavera: yá los días son más l.largos ya las nueite más cortas. Por eso se diz que «En febreiru, fusada ya escuseiru», o seya, que yá nun da tiempu a faer dúas fusadas: namás una ya media, porque las nueites menguanon.