LA FAMA DE LA PRIMAVERA

Diz el reflán que «Marzu, un día malu ya outru buenu». Igual qu’esti, hai outros muitos proverbios que desconfían del mes en que termina l’iviernu. Marzu nun yía, entós, un mes con buena fama ya outras sentencias dicen que marzu yía un mes traidor, l.loucu, etc.

Pero a marzu naide-l.ly puede quitar el privilexu de ser el mes nel qu’entama la primavera.

Si marzu tien mala fama, la primavera tienla bien buena. Nun hai, seguramente, una parte del ciclu que fai xirar el molín del tiempu con mechor aura que la primavera. La primavera recueche tolos tópicos positivos, l.literarios ya tienros que se dicen del pasu del anu.

Unu de los muitos tópicos de la primavera yía xunir esta estación cona poesía. Anque en realidá nun yía tan guapa como la idealizan las metáforas, la verdá yía que cuando amiramos pa la estación de la primavera paez que tou yía poesía. Pero con esti tópicu vivimos al borde de la fana: tamos nun cantu mui inseguru que l.linda igual cona guapura que cona ridiculez. Porque muitas de las citas poéticas primaverales son cursis dafeitu.

Sicasí, anque mentar la primavera paez que yía metese nel mundu sosu de la simpleza ya la vulgaridá, dalgunas imáxenes l.literarias pueden con el tópicu ya yían universales. Por exemplu, cuando Neruda dicía «serán quien a cortar las flores, pero nun serán a parar la primavera».