Paumanok

Nuna primavera como ésta, pero van cuasi doscientos anos, en 1819, nacíu’l poeta norteamericanu Walt Whitman. Anque seya un autor del sieglu XIX, Whitman yía unu de los grandes escritores onde podemos reconocenos la xente de los sieglos que vinieran darréu.

La sua obra, Fuechas de hierba , fíxola un día ya outru, edición tras edición, como una iniciativa propia. Dengún poeta fixo una poesía más de sí mesmu que la que escribíu Whitman. El sou “Cantu a mi mesmu” yía una estraordinaria construcción l.literaria onde l’alma ya’l cuerpu de cada unu de nós como individuos son la referencia decisiva, el manantial del que vien la forma de la guapura.

Whitman nacíu en Long Island, la isla que, nadando al l.lau de Nueva York, tien forma de truita. Teníase a sí mesmu como “chegáu de Paumanok”. Paumanok, que yera’l nome que los indios dieran a la gran isla, yía’l territoriu, el trampolín de la colonización americana, onde afitaba Whitman la sua identidá, que yera una simbiosis de la sua identidá propia ya la de la nación que daquel.la yera xoven ya considerábase un ideal democráticu pal mundu.

Pero siempres en Whitman gana la naturaleza ya l’al.legría por ser parte d’el.la. Las suas fuechas de yerba son versos d’entusiasmu pola vida:

Ya enriestraré

los mieus poemas

igual que nun filu,

porque’l tiempu

ya lo que pasa

son coherentes.