Alicia alcuentra la l.libertá baxo’l tapín

AAlicia alcontrábase al pía del ríu Sil, xunto a las brimbas que salían nas piedras ya l’augua. Yera la tarde d’un val.le fondu ya estreitu, el día de San Xuan, cuando verdes montañas bril.laban al sol. Xunto al ríu había un prau chanu, tan chanu que yera la esceición nun país onde tou yera vertical. Amiraba el.la pa la guapura d’aquel prau recién segáu cuando víu a un gochín blancu que, con chalecu encarnáu, acercábase a un furacu qu’había no tapín. Alicia víu al gochín metiéndose pol furaquín, quedóu clisada ya pensóu, entós, que yera guapa cousa baxar tamién al fondu de la tierra.

Baxóu pa debaxo del tapín ya alcontróu un mundu maravil.losu, con pueblos pintos, mares inmensos, tiendas de miel ya millones de l.libros de cuentos fantásticos. Había nun tachuelu una mozadina de caramelos ya un tanquín de l.leite frescu. Si metía un caramelu na boca, crecía Alicia ya cuando bebía l.leite, menguaba. Pasóu pola puerta d’un bedul ya invitánonla a la merienda. Alredor del velador taba aquel gochín blancu con chalecu encarnáu, el que se metiera pol tapín. Pero taban tamién el Chocolateiru ya’l L.lumiacu Mariel.llu. El Chocolateiru apurríu una taza a Alicia, pa que bebiera.

Hubo las presentaciones de costume. Al poucu, dixo’l gochín amirando pa la nena:

— ¿Échote un poucu más de chocolate?

— Entovía tengo la taza vacía, asina que nun puedo querer más.

— Boba, querrás dicir que nun pueis querer menos, porque yía fácil querer más chocolate si nun tienes nada. Lo que yía imposible yía querer menos chocolate cuando nada se tien. ¿Daste cuenta?

Alicia amiróulu con güechos mui abiertos ya enfadóuse con aquel personaxe que se creía tan l.listu. «Déxame en paz», dixo.

En terminado aquel.la merienda tan l.louca, el gochín invitóula a pasear por aquel mundu qu’había baxo tierra. «Yía una maravil.la, yía un mundu fantásticu», pensóu Alicia.

Mañana cúmplense 188 anos del nacimientu de Charles L. Dodgson, o seya, Lewis Carrol, que viera la l.luz el 27 de xineiru de 1832. Intelixente matemáticu, profesor no Christ Church de la Universidá d’Oxford, autor de «Alicia no país maravil.losu» ya «Alicia a traviés del espechu», alcontróu la muerte pola mor d’un catarru. Siempres tuviera pánicu a las corrientes ya matóulu una d’el.las nas frías murias del ‘college’ onde daba clas.

Gracias a Lewis Carrol el mundu yía agora mechor, más guapu, más prestosu, más al.legre, más intelixente. Ya tamién más l.libre, porque la busca d’un mundu maravil.losu yía lo que fai que seyamos quien a dexar de vivir presos d’esta realidá tan fosca dalgunas veces ya tan falsa, tan poucu verdadera siempres.