La biblioteca de los hititas

Paezme que yera pol outuenu, cuando yá la friura enseña los colmiel.los del iviernu. Un profesor quixo que fuéramos a una biblioteca ya qu’escochéramos un l.libru pa faer un trabachu. Daquel.la nun se faían esas cousas, asina que güei veio aquel.la actividá como un l.labor adelantáu no tiempu.

Cheguemos a la Biblioteca qu’hai por Santa Nonia ya entremos de golpe un grupu bien grande d’estudiantes semando’l desconciertu na sala onde debía guardase silenciu. Fiximos muitu estrueldu ya’l probe funcionariu encargáu de la biblioteca al.louriaba pola mor d’aquel.la invasión no espaciu de los l.libros. Yéramos muitos, desmasiaos. Xunto a mi entranon David Fernández Villarroel, Ernesto Escapa ya unos cuantos más.

Alcontréi ceo un l.libru pa mi: unu grande tituláu «El misterio de los hititas», del que yera autor C. W. Ceram. Prestóume’l títulu ya tamién lo que se contaba naquel.la obra: un pueblu que viviera pola parte d’Anatolia, na península de lo que güei yía Turquía. Nas piedras rotas cubiertas de matos ya piornos los arqueólogos descubrían una civilización paralela a los imperios del Nilo. Agora namás el silenciu manda naquel.las tierras ermas onde hubiera centros urbanos como Hattusa, Sapinuwa o Azatiwataya. El tiempu desanicióu aquel.la potencia militar que tenía reis como Arnuwanda, Shubiluliuma, Hattusili o Muwatasili. Consérvase una auténtica biblioteca de tablinas con escritura cuneiforme, onde apaecen temas militares ya comerciales.

Volví (cona imaxinación) a Anatolia unos cuantos anos más tarde, al l.leer lo que dicía la chamada «hipótesis anatolia», de Colin Renfrew, que suponía que la patria primera («urheimat») de los pueblos indoeuropeos fuera la península d’Anatolia. Criticánonlu muitu, porque había conceutos ya cousas no vocabulariu indoeuropéu que nun esistían daquel.la pola zona d’Anatolia.

Dalgunos l.libros puen sere esenciales anque por sí mesmos nun seyan importantes, porque van caminando con unu mesmu pol sendeiru de la hestoria personal. Ya en cada etapa, cuando dexamos la carga nun pousadeiru ya nos ponemos a pensare, cada l.libru tien un significáu especial. La época de la xuventú temprana, cuando’l mundu ta abiertu ya nun hai barreras, yía la época inxenua, pero la mechor, porque creyíamos qu’había una verdá auténtica, antias del cinismu destructivu. Una verdá más emocionante si s’alcontraba detrás de las guardas fantásticas del misteriu. Ya un misteriu que nun yera una rendición a la superstición, sinón la ventana a la que nos engaramábamos pa descubrir el placer de pensar ya trazar esplicaciones a la hestoria, al mundu ya a la vida.