Bruxos de ciudá ya bruxas de monte

El próximu día 5 cúmplense 739 anos del nacimientu de Don Juan Manuel, escritor del sieglu XIII, mui importante pa la l.literatura en l.lingua castel.lana. No sou l.libru El conde Lucanor alcontramos una riestra d’hestorias, una guapísima serie de ficción medieval, anque con una finalidá moralizante. A mi de tolas hestorias la más me presta yía la que tien como títulu «Historia del deán de Santiago y el mago de Toledo». Un altu cargu de la Ilesia quier deprender la nigromancia (arte bruxeril d’adivinación conos muertos) ya va al más importante nigromante (‘nekros’, muerte ya ‘mantis’, adivinu) de Toledo pa deprendere la bruxería a cambiu de prometer un gran favor. Mientras deprende avísanlu pa ascender na Ilesia hasta chegar a papa, pero nun cumple la sua promesa. De forma máxica, entós, vuelven al cuartu del nigromante, al momentu de la promesa, ya’l deán marcha avergonzáu porque nun cumpliera la palabra dada. La enseñanza yía que cuanto más xube’l que te debe un favor, menos probable yía que te lu devuelva.

Quedamos en Toledo, ciudá cosmopolita de la nigromancia, según diz la l.leenda. Debaxo de la ciudá había cuevas ya calechos que yeran como una universidá máxica a la que venían estudiosos del mundu. Pero l’universu máxicu yía un archipiélagu de continentes, onde hai países máxicos a esgaya. De los bruxos urbanos saltamos a las bruxas de La Veiga’l Palu, en L.laciana ya no borde con Cangas del Narcea. Las bruxas de La Veiga’l Palu son mui queridas pol Molín del Tiempu, igual más de la cuenta. Son bruxas de monte, o seya, más salvaxes ya agresivas, anque xenerosas. En terminando l’aquelarre nun l.limpiaban los restos que quedaran, sinón que dexaban las sobras pa que los paisanos al día siguiente madrugaran ya las pañaran. Los nigromantes de Toledo tenían salones ya bibliotecas embaxo la tierra, ya faían los ritos na escuridá namás rota por candiles siniestros. Las bruxas de monte podían ser analfabetas, pero conocían los suétanos del alma tan bien como las escobas ya los bedules de la montaña. Pa los ritos ya los pautos con L.lucifer non siguían las fórmulas de dengún l.libru, sinón que, embusteras ya bail.larinas, saltaban polas fogueras ya escandalizarían a los vecinos de Cagual.les si las miraran a la l.luz de la l.luna.

Los nigromanes de Toledo tenían una ríxida xerarquía según las publicaciones ya la bibliografía propia, las bruxas de La Veiga’l Palu enxamás enseñaban el currículum. El.las namás bail.lar ya bail.lar. Los bruxos de Toledo yeran dionisíacos-apolíneos. Las bruxas de monte, dionisícas dafeitu. Siempres hubu diferencia ente campu ya ciudá.