El mes de San Xuan
El Calendariu de San Isidoru dibúxanos esti mes con un home ensin detalles na cara. Tamién el pasu del tiempu desdibuxóu las yerbas que tien na manu esquierda, un feixín de plantinas esblanquisnadas. El paisanu va cortando esas plantinas con una fouz que tien na manu dereita. ¿Cuálu yía’l menxax d’esta representación? Yía que la primavera termina ya que vamos entrando no branu. Ya eso quier dicir que’l trabachu agora será más bien recocher lo que se plantara, segar lo que creciera, meter en casa lo que dieran las tierras ya los praos.
Pero entovía nesti mes de San Xuan hai muita primavera, asina que fai falta siguir trabachando la tierra que se semara. Hai qu’arrincar las malas yerbas qu’afuegan el frutu que la familia busca. Tamién hai que dir arriandando, o seya, fai falta arimar la tierra a la planta pa que creza sana ya bien feita. Los homes ya las mucheres tienen que doblar el l.lombu ya, cuantayá, en tiempos pasaos, nun se despreciaba l’ayuda de los nenos si nun diban pa la escuela. Yá lu diz el reflán tradicional, güei un poucu incorreutu políticamente: «el trabachu d’un nenu yía poucu, pero’l que lu desprecia yía un l.loucu».
En bien de sitios síguese la güelga del l.latín («Iunus»), pero a mi préstame muitu más el nuesu nome de «mes de San Xuan», porque afita ya resalta la entrada del branu. La fiesta del solsticiu siempres fuera mui importante pa la humanidá: el sol paez quedar quietu no solticiu de branu pa dir menguando, mientras que s’espurre pa dominar el día cuando chega l’iviernu. La preba de la importancia ritual de los solsticios yía que la cristianización reservóu pa el.los unas fiestas muitu importantes: San Xuan ya San Pedro pa la chegada del branu ya la Navidá pa la entrada del iviernu.
El sábadu que vien yía cuando astronómicamente chega’l branu, a las 23:44, pero será na nueite de San Xuan cuando se celebre ritualmente. Esta guapa nueite alita entovía en muitos l.lugares, onde s’entamará la gran foguera. Ya xunto al l.lume purificador habrá xente que busque untar la sua piel cona humedá primera de la nueite, el mechor remediu pa defendenos de la enfermedá ya pa l.lograr la fertilidá del vivire. Ya la xente que guarde una ilusión, la xente que nun s’alcuentre enferma pola realidá, será quien a ver unas guapas mozas blancas xunto al augua ya los sumicios manifestándose al pía de los sendeiros, vixilaos polas bruxas. Será guapu ver la danza de los trasgos ya mui emocionante sentir a Oberón, el rei, dispuestu a danos la copa máxica que nos cure, si fai falta, del mal. Especialmente del mal de güechu, el de la envidia qu’envenena la vida.