Inverness, los salgueiros

Una ciudá como Inverness ya una planta como’l salgueiru nun tienen nada en común, porque son cousas estremadas dafeitu. Pero un momentu de la vida yía quien a xunire los seres más desiguales del mundu.

Acercábase, igual qu’agora, el día de San Xuan, cuando entaméi un peregrinax polos países celtas. Yera you daquel.la un estudiante que buscaba faere un viax niciáticu al orixe fantásticu. El puntu de partida tenía que sere Inverness, la capital de la Escocia del norte.

Cuando’l tren chegóu yera tovía mui bien ceo. Tolas casas taban pechadas, nun había a ónde dir. Caminéi, entós, pola ouriel.la del ríu Ness, el ríu que vien del l.lagu con monstruu ya duerme tamién al pía de castiel.los chenos de suenu. Caminéi ya caminéi pola ouriel.la hasta qu’alcontréi un sendeiru que diba a la par d’un pequenu ríu afluente. Siguí por aquel sendeiru ya entós alcontréi los salgueiros.

Según Borges, hai un momentu en que la tarde quier parl.lar con nós. Esta afirmación borgiana paezme una verdá universal en cuantas al tiempu, pero tocante al espaciu tengo you outra verdá, particular ya muitu más humilde, que diz que tamién hai un sitiu que quier conversar con nós. Esi territoriu yía’l de los salgueirales.

Conozo bien los salgueiros porque muitas veces caminéi ente las piedras ya l’augua del ríu Sil, onde salen las brimbas ya posan las l.lavanderas. You percibí muitas veces la fuerza intimista d’esa planta ondulante xunto al ruxrux del augua. Entrar onde los salgueirales yía penetrar nel alma que va con nós. Apartar conas nuesas manos aquel.la planta suave yía abrir los pliegues de la memoria.

Tamién los salgueiros son quien a curar el nuesu cuerpu, fayendo afuxir la fiebre ya’l dolor, como yá sabían las viechas civilizaciones de Mesopotamia. Agora la sua sustancia chega a nós en pequenos círculos blancos acetil-salicílicos.

En terminando aquel suenu diurnu polos salgueirales ya teniendo bien afitada l’alcordanza del ríu Sil, volví pa la ciudá ya contempléi la Inverness real, dominada pola cultura inglesa. Igual que nós, Inverness perdía la sua esencia. Una gran casa blanca, ALBA, informábame del gaélicu, pero las suas palabras entraban yá no tiempu en que mengua’l día ya crez la nueite.

Al amanecerín de Dios alcordéime outra vuelta de los salgueiros, pero nun caminéi pa onde el.los. Yía verdá que son plantas que curan, pero tamién el viax yía un tránsitu qu’apacigua los tendones ya desanicia’l dolor de los pensamientos. De golpe, la l.luz pálida d’Inverness, yá un poucu nórdica, indicábame que yera’l momentu de dir más arriba, yera’l tiempu de xubir hasta las Hébridas.