La casa del diañu

Va un cuantu tiempu, al.lá pol mes de Santamarina o xunil.lín del anu 1912, escribía irónicamente Franz Kafka no sou diariu unas l.linias muitu interesantes no tocante al diañu. La cuestión yía si namás hai un diañu o si hai muitos. Si namás hubiera unu, la cousa nun sería mala, porque en casu de que s’apoderara de nós tendríamos una vida tranquila. Lo terrible sería qu’hubiera diablos a esgaya, porque entós andaríamos espuestos a los amores ya odios entre el.los. Porque los diaños, como los humanos, un día l.lévanse bien ya outru día andan a palos.

En tolas culturas hai un espíritu del mal, una especie de divinidá perversa, ya tamién hai bandas de diaños en muitísimas partes del mundu. Culturalmente, el diablu yía universal ya la ciencia que los estudia, la demonoloxía, yía una enciclopedia inabarcable. Basta quedase no pensamientu xudíu p’al.louriar cona variedá de diaños qu’atopamos, como podemos vere no escritor hebréu Isaac B. Singer, del qu’ayer se cumpliera’l sou trenta cabudanu, porque murríu’l día 24 d’esti mes en 1991. En Singer apaecen Lilith ya outras figuras maléficas de la riestra interminable de demoños xudíos.

You, como devotu ya creyente na divulgación de la ciencia físico-química, nun creyo na esistencia material del diañu, igual que pienso que la Tierra nun yía’l centru del universu. Pero tengo que reconocere que dende pequenu escuitéi hestorias de diaños, seres más bien malos, anque muitas veces con un aquel d’inxenuidá ya de burl.la. Contábame la mia bolica que la mucher d’una familia forestera taba endiablada ya que faían pa el.la tortiel.las ya poníanlas no sou peitu, «pa que comieran los diablinos las tortil.linas ya la dexaran a el.la tranquila». Tamién me contaban que’l diañu (o los diaños) vivían nos Caldeirones, no Infiernu, onde cuecen a los malos en potes grandísimos ya con cucharones xigantes revuelven el caldu, que fierve con un l.lume infinitu. Outramiente, los demoños tienen cuernos ya viven en comuña conas bruxas, outra constelación simbólica.

Resulta que la l.literatura d’agora, cuando quier dibuxanos el mañana (ciencia ficción, por exemplu), fai siempres personaxes que son, en realidá, outra vuelta seres con xeitu de diañu. Paez que nun somos a imaxinare una historia ensin el diablu, que l.logróu adautase bien al mundo dixital. Ya si de verdá nun existe físicamente fuera de nós, entós lo que pasa será que lu l.levamos dientro de la nuesa alma, como parte inseparable d’el.la. El mal absolutu yía una categoría sofisticada creada pola humanidá. Por eso mesmo nun somos a velu, pero tampouco nun somos quien a vivire ensin él.