Aquel.las monxas de Zamora nun yeran unas candongas, non
L’historiador Peter Linehan no sou l.libru The Ladies of Zamora estudióu un famosu casu de monxas ya flaires implicaos nun supuestu escándalu sexual. La priora del monesteriu zamoranu de «Santa María de las Dueñas», escribiera que los monxos faían muitos «desordenamientos» conas monxas, «desnuandosse» ya quedando «comol día que nascían». La carta escribíula la priora al final del sieglu XIII ya culpaba a los flaires predicadores. Taba escrita en romance ya Américo Castro fixo, van cuasi noventa anos, un estudiu l.lingüísticu d’el.la, con interesantes observaciones filolóxicas.
Paez qu’unas monxas querían a los monxos, mandándose mensaxes a traviés de las murias del conventu, pero outras non. A la priora castigábanla con palizas ya cono mal de güechu. Dalgún flaire chegóu a usar roupa de monxa naquel.las remesturas escandalosas. Ya una monxa nun se conformaba con un mante: tenía dous, unu nuevu ya outru viechu. Esti recitaba: «Mia monxanxelina, nun quieras al rapaz, quierme a mi, que val más viechu buenu que rapaz malu» («… magis valet bonus senex quam malus puer»).
Linehan estudia los conflictos económicos ya políticos, causa d’estos supuestos escándalos morales. La griesca ente las órdenes relixosas obligóu a intervenir al Papa Nicolás VI castigando al xefe de los dominicos. Las monxas d’anguanu ayudan a la xente ya faen un l.labor exemplar, pero la Edá Media yera outru mundu: daquel.la yera tan grande’l poder de la Ilesia que’l mal podía pipar dientro.
D’alcuerdu conas denuncias, unas monxas nel monesteriu yeran bien candongas. Por ciertu: qué palabra tan guapa ya sonora: «candonga». Sentíla muitu pa referise a la mucher qu’andaba fuera de casa, festexera ya con un aquel de malicia sexual. La palabra nun yía namás de la nuesa l.lingua: alcuéntrase en gal.legu-portugués ya en castel.lanu, onde tien dalgún outru matiz ya más significaos. Pero tuvo siempres pa mi esta voz un aquel amable: pronunciar «candonga» l.levaba ironía ya sonrisa. Pero ¿podemos chamar «candongas» a aquel.las monxas del monesteriu medieval de Santa María de las Dueñas? ¿Podemos dicir que candonguiaban por culpa de los flaires de la zona, entovía más candongos qu’el.las?
A mi paezme que non. Seguramente fuera una hestoria manipulada ya politizada. Nun yeran unas candongas aquel.las monxas rebeldes: representaban una nueva visión del mundu naquel sieglu XIII. Yeran mucheres que buscaban sere más independientes, como las beguinas que proliferaban pol norte d’Europa. Probablemente fueran un precedente de reivindicaciones que buscaban más autonomía pa las mucheres na práutica relixosa