Los osos, más cerca
Va tiempu que la xente de Palacios del Sil manifiesta la sua alarma pola invasión de los osos. Pa los que viven en dalgunos pueblos l’osu ya outras fieras del monte perxudican ya faen difícil la vida diaria.
Pero l’osu yía’l nuesu tótem. Los palaciegos l.levamos bien de sieglos conviviendo con el.los: tolas casas tienen hestorias compartidas con osos. Tienlas tamién la mia familia: sentílas del mieu buelu, cazador na busca de la supervivencia. Sentílas de la mia boliquina Felicidá, que siendo una nena xubía pa la braña ya atopóuse con una osa con esgaños, como chamamos ail.lí a los esbardos. Quedóu petrificada porque la osa l.levantóu las patas d’alantre, pero al final pasóu de l.largu ya Felicidá chegóu a la braña, onde entamóu una gran chorada.
Alcuérdome d’un portugués que paraba en casa ya alcontróuse con un osu ya vieno unos cuantos quilómetros corriendo. Al chegar al pueblu tenía’l corazón a puntu de reventar, pero la cara taba pálida como la cera, porque un osu amenazante puei revolver el pánicu que guardamos no inconsciente coleutivu.
Una valiente tía mía espantóu a un osu que chupaba la sangre d’una vaca nos montes solitarios: l’osu marchóu, pero la vaca, chena de dolor ya desorientada, enturrióu a la tía Araceli, que salvóu porque la garrara polos néfetes.
Hubo unos cuantos anos nos que los osos andaban acobardaos ya víanse poucos, anque en Palacios siempres hubo muitos, hasta cuando según los espertos taban acabándose. Palacios yía un paraísu pal osu porque tien grandísimos montes con árboles ya frutos prestosos. Tamién porque yía pasu pa entrambas ouriel.las del Sil.
El primer síntoma del cambiu de las cousas vilu cuando, va yá unos anos, comentéi en casa que pensaba xubir por un sendeiru ya dixenon: «Ten cuidáu, qu’anda l’osu». L’osu vuelve al pueblu, tien querencia polos humanos. Nun se conforma yá cono miel del cortín, agora esgaza las canas de los árboles con frutu, desfái los cierres de las fincas. Pasa la nueite polos güertos ya pasea al l.lau de las casas.
Estas hestorias tienen una hestoria: hasta los anos sesenta había osos a esgaya. Menguanon más tarde. Agora la nueva moralidá manda respetar la vida de los osos, lóxicamente. Los palaciegos quieren a los osos, esos viechos amigos, pero nun puen faer nada. Los probes osos nun entienden el problema ya yía difícil dialogar con el.los. Yía obligación de los políticos controlar el tema, pa que lo qu’agora yía un problema pueda sere una solución pal futuru de la zona. Quitanon el carbón ya la ganadería: ¿será muitu pidir a los que mandan que dexen que la xente siga siendo amiga de los osos?