Las retafilas de los nenos
L a investigadora Ana Pelegrín, qu’estudióu la tradición oral infantil, regalóunos nuna de las suas obras esta retafila recochida n’Abelgas de L.luna:
— ¿Tu padre fue a lobos?
— Sí.
— ¿Matólos todos, todos?
— Sí.
— ¿Dejó una lobina?
— Sí.
— ¿Vamos a matala?
— Sí.
— ¿A soplines o a soplones?
You sentí de pequenu una cousa que se paez muitu. Yía una retafila infantil que se recitaba antias de soplase na cara como pa faere que l’outru nenu nun fuera quien a respirare. La fórmula que you escuitéi yía esta:
— ¿Tou padre foi a mouros?
— Sí.
— Matóulos todos, todos?
— Dixo’l rei ya la reina
qu’anduviéramos a soplos.
Soplaban los dous nenos hasta que perdía el que yá nun podía respirar más. Las fórmulas de los xuegos infantiles son crueles ya non correutas políticamente, pero la sua musicalidá yía guapa, porque son una creación del pueblu, ya’l pueblu garantiza la guapura ya la eufonía. Estas sonoras retafilas van a la par de los xuegos de los nenos, pero como bien observa José Manuel Fraile, etnógrafu ya bril.lante estudiosu del Romanceiru, l’universu de los xuegos infantiles son un caxón de xastre onde quedan aparacaos los vezos que primeiro fueran cousas d’adultos.
Esti investigador cita Torrebarriu de Babia como un sitiu onde, por exemplu, conservóuse la tradición oral tocante a la «dilinguina» (que yía como chaman al columbiu en dalgunas zonas babianas). Fraile, por ciertu, yía coautor d’un l.libru tan guapu como difícil d’atopare («Al vaivién del columpio») no que s’estudia la cultura ya las fórmulas alredor d’esti xuegu que fuera frecuente no galantéu de los adultos. María Jesús Ruiz ya Susana Weich-Shahak dan guapísimas informaciones tamién nesta obra sobre la cultura de las retafilas del columbiu n’Andalucía ya no mundu sefardí. Esta última profesora, Susana Weich-Shahak, investigóu va unos anos pol Altu Sil contrastando los romances d’aiquí conos de la xente sefardí.
L’estudiu de los xuegos de nenos ya nenas danos muita información sobre la cultura tradicional, pero tien outros aspeutos d’interés. Valnos pa ver la relación campu-ciudá, porque cuando la moda de dalgún xuegu se desaniciaba no mundu urbanu, esti xuegu siguía vivu anos ya anos pa los nenos de los pueblos. Un exemplu interesantísimu de la relación de dependencia del mundu rural respeuto a la ciudá. Outra idea vien igual a cuentu: aquel.las retafilas ya fórmulas que sonaban tan bien, ¿tenían importancia pa la educación emocional? El nuesu tiempu d’agora yía muitu más poderosu, pero nun tien aquel.los sones balsámicos. ¿Ayudaría aquel.la música infantil a vivir nun mundu más tranquilu ya menos convulsu?