Piecha los güechos

Del mesmu pueblu que you yera aquel compañeiru d’estudios, que, l.luenxe de la sua casa ya chenu de tristura ya murnia pola alcordanza que sentía de la sua familia, tenía namás tiempu pa disfrutar cuando, pola nueite, mientras dormía, los suenos faíanlu volvere a la tierra de sou. Nun s’alcordaba de tolos suenos, pero antias de l.levantase quedaban nél, anque non por muitu tiempu, las imáxenes caberas del sou nial maternu. Si faía un poucu d’esfuerzu, yera quien a suxetar, a tener manu d’aquel.las imáxenes ya a lo l.largu del día reproducíalas pa calmar l’angustia, la fana abismal ya peligrosa.

La fantasía onírica yera la defensa que tenía aquel compañeiru ya’l suenu faía posible negar la prosaica ya escura rutina diaria: atopaba un mundu feliz que nun tenía realidá física, pero sí consistencia nel alma. Pasaos dous anos aquel compañeiru marchóu por fin del internáu ya volvíu pa la sua casa ya pal sou mundu. Los anos que pasara naquel.la prisión estudiantil, escelente como manantial de conocimientu, fixénonse mechores gracias al bálsamu de los suenos de la nueite. L.logróu la salvación gracias a la introversión radical, a volvese a lo más fondu de sí mesmu, a la l.laguna, dalgunas veces turbia, dalgunas veces cristalina, de la sua vida interior, onde siempres taba encesu, como una l.luz bril.lante, aquel trozu del cielu que yera la sua pequena patria.

Agora aquel compañeiru vive no sou pueblu ya yía probable que nun s’alcuerde pa nada d’aquel.los sufrimientos nin de la cura de los mesmos que l.lograba gracias al suenu ya a la inconsciencia que lu dexaba volver a los momentos felices. Pechar los güechos pola nueite, antias de perdere la conciencia superficial, yía un mecanismu que nos l.libera de parte de las amenazas.

Piecha los güechos ya vuelve a ti mesmu. Esa yía una recomendación que, dende va muitu ya en tolas culturas, alcuéntrase como forma d’atopar la serenidá ya afuxir de los males que nos arrodian. Una representación bien prestosa d’estas ideas veise nas obras del escultor Jaume Plensa, nas que destaca la importancia de la cabeza humana guardando un universu. Igual na sua obra “Nómada”, que puei veise n’Antibes, qu’en “Julia”, agora puesta no centru de Madrid, la figura de la cabeza paez dicinos “piecha los güechos ya amira pa dientro de ti”. Porque nos estantes de dientro de nós guárdanse claves interminables, unas d’un xeitu, outras d’outru, pero todas ferramientas posibles p’abrir los portiel.los del bien. Cualquier representación de la nuesa capacidá pa pensar fainos ver qué fácil yía la solución de muitos problemas si volvemos a nós mesmos.