La nuesa industria pequena: la fraugua

El tiempu cuerre, l’iviernu alcanza escapáu a la primavera ya’l branu al outuenu: asina desanicianon el nuesu patrimoniu económicu. Había nos pueblos una pequena industria que cumplía una guapísima función económica. Refiérome a las frauguas, esas pequenas industrias nuesas, onde casas ya familias alcontraban cousas necesarias pa la vida diaria ya pa los l.labores cono ganáu ya conas tierras.

Igual nas casas que nos l.labores de fuera, la familia necesitaba clavos, puntas ya outros oxetos p’axeitar cualquiera cousa que s’estropeara. Si una cousa nun valía yá, a lo mechor na fraugua podían faete outra pieza sustituta. Podía faere falta un clavu, una calavicha, un piechu. Igual pa la mesma corte había que dir a la fraugua ya trayere un fierru p’axustar una madera. Muitas ferramientas tienen partes de fierru ya, entós, na fraugua l.lográbase poner bien lo que s’estropeara. La fraugua podía fabricare un oxetu ya tamién podía terminalu, aguzalu ou cambialu según lo que necesitaran los vecinos.

Si nun hubiera industria del fierru, la vida tradicional nun sería posible dende van muitos sieglos. El fierru venía del sitiu onde lu fundieran, nas ferrerías, por exemplu; pero pa que chegara a la xente tenía que terminare na fraugua del pueblu, onde’l ferreiru daba forma final a las cousas ou cambiaba las que necesitaban dalguna trasformación. Pa dalgunos trabachos podía faere falta dir a la fraugua d’outru pueblu, porque dalgunas frauguas taban especializadas en dalguna pieza concreta.

Préstame muitu la fraugua ya lo que significaba. De pequenos díbamos a la fraugua ya pasábamos las horas muertas escuitando los golpazos que daba’l ferreiru ya cómo ponía encesu’l fierru pa l.lograre buena forma. Yera mui prestosu’l barquín, el fuel.le que daba fuercia al l.lume que faía posible manipular los fierros. La xente pequena mirábamos pasmaos pa la pieza encesa, mientras pasaban clientes que pagaban con moneda ou n’especie.

Las frauguas yeran la nuesa industria popular, la que nos arroubanon pa l.levala a la ciudá, desertificando los nuesos val.les, agora ermos. Las fraguas yeran las nuesas fábricas. ¿Fábricas? Sí, habéis de sabere que la palabra ‘fraugua’ vien de la l.latina ‘fabrica’. La ciudá quitóunos aquel.las fabriquinas nuesas ya agora vende el.la las cousas de fierru a la xente de los pueblos. Nun tuvo por qué sere asina: no norte d’Italia, por exemplu, hai grandes industrias de forxa del fierru en val.les verdes del mundu rural, onde supienon guardar ya desarrollar el sou patrimoniu industrial.

Las frauguas chegan con melancolía al Molín. Prósimamente, los ferreiros.