miércoles. 06.07.2022

El Marte del mes de marzu

Na tabierna que tuvieran los mieus buelos había vasos de vinu, pero you nun sabía qué yeran las viñas nin cómo yeran las vides. Dalgunos anos depués, polas tierras de más al sur, contábanme los amigos hestorias de la vendimia o de las cepas, ya a mi aquel.las cousas resultábanme bien raras. La cultura de faer el vinu yía una cultura estraña pa mi, anque reconozo la importancia del vinu na nuesa civilización. ¿Qué sería de nós si nun fuera por Dionisos ya Baco, los dioses que siguen descubriendo’l cantu escuru ya bril.lante de la bébora?

Busco no Calendariu agrícola de San Isidoru la imaxe del mes de marzu. Veio no centru de la imaxe a un paisanu que, bien abrigáu con una capa, tien na manu una navacha o cuchiel.lu de podar, curvu na punta, ya va cortando la planta. Yía normal, porque no mundu mediterráneu yía asina: aprovéitase l’iviernu, cuando para la savia, pa quitar lo que nun val de las vides. Pero a la esquierda de la imaxe hai un nome: MARCIUS (‘mes de marzu’, l.latín MARTIUS). Porque’l nome d’esti tercer mes vien de Marte, dios de la guerra, al que taba consagráu.

DL22P36F4-21-19-15-9

El mes de marzo según el Calendario agrícola de San Isidoro. DL

Hai una cousa que nun me cuadra. ¿Por qué se dedica a Marte esti trabachu de los campesinos? La xente del campu, los paisanos nun tienen nada que vere cona guerra: yía l’aristocracia la que tien la bandera de la espada, de la sangre ya de la fuercia. La solución a esta paradoxa alcontrámosla en que Marte nun yía namás el dios de la guerra, sinón tamién el dios de la vexetación, de l’agricultura ya de los campesinos. Identíficóuse a Marte cono dios griegu Ares ya suel dicise que representa la guerra, pero la verdá yía que Marte yá yera antias un dios itálicu, una divinidá que protexía la naturaleza ya l’agricultura ya tenía como símbolos el picatueru ya’l l.lobu.

A esti dios Marte defensor del los l.labores campesinos yía al que se dedicaba marzu, que yera’l primeiru del anu antias de que la reforma del calendariu xulianu puxera delantre los meses de xineiru ya febreiru. El marzu primitivu yera’l mes del cambiu d’anu ya dedicábase a los ritos de fecundidá de la tierra, con bail.les ya sacrificios pa protexer la casa campesina. Con esti Marte sí cuadra la imaxe del Calendariu agrícola: el paisanu poda las vides xunto al Marte que lu cuida ya defiende.

Agora cuéntanos marzu los proverbios del tiempu caprichosu ya los reflanes del pasu de la vida, como aquel que diz: «Marzu nialarzu, abril guviquín, mayu paxaral.lu, San Xuan volarán ya por Santa Marina canta la paxarina». Sigue siendo marzu, entós, el mes de la xente que trabacha la tierra, la que corta la planta ya nun l.levanta la espada.

El Marte del mes de marzu
Comentarios