Tiempu de demolición
Vivimos tiempu de demolición. Los demoledores van pola xeografía industrial afitada no mundu rural pa dir esbarrumbando las construcciones d’una economía próspera que fixo que la xente viviera. Una economía que valía muitu ya que faía posible que la familia cuidara a los sous fichos, pudiera mandalos a estudiar ya poblara los territorios qu’agora van quedando ermos ya solitarios, ensin nenos que xueguen nin viechos que cuenten las suas hestorias.
La demolición tien una xustificación racional, porque fai falta quitar las ruinas inútiles. Sicasí, estos l.labores filantrópicos ya racionales escuenden una apasionada suciedá. Desanician material sobrante, sí, pero vienen cona intención escura d’afitar un desiertu. Escribía’l gran Gaston Bachelard que, cuando se busca la muita l.limpieza, escuéndese en bien de casos un deséu turbiu. Los demoledores faen desapaecer la memoria de la vida que floreciera por muitos ya muitos anos.
La práutica de demoler yía mui viecha, dende qu’hai seres humanos. Hai un «Manual de demolición» que tien dalgunos puntos que podemos destacar. Unu yía que l’arte de domoler yía una ciencia. Los executivos de la ciudá estudian con muitu cuidáu ónde poner la bomba que faiga más dañu con menos esfuerzu, cómo destruir más con poucu costu. Una ciencia al serviciu de la tranquilidá del presente: las ruinas industriales del campu yeran testigos incómodos d’un pasáu vivu.
Outru puntu del manual yía que la demolición yía más que faer desapaecer edificios. Yía principalmente un fenómenu simbólicu, un auténticu ritual de muerte: fai falta una manifestación alegórica de qu’aquel.lo nun volverá. Una enseñanza pal pueblu, porque esti espectáculu de polvu, estrueldu ya destrucción vien con un mensax: «Esto, amigos, acabóuse. Conformáivos».
Un tercer puntu del manual yía que cuando chega un fin de ciclu faise una demolición. El molín del tiempu trabacha en etapas l.largas ya cuando una época acaba, los demoledores encárganse de xestionar la transición, con esplosiones violentas que marcan los treitos del tiempu hestóricu.
Hai un cuartu puntu del manual de demolición: buscan el nuesu bien, l.limpian la mancha que dexaran los buenos días del pasáu, borran la negrura del carbón ya la herencia contaminante. El problema yía que, dempués de las esplosiones, namás queda la nada. Seyamos xustos: tamién quedan en pía los banzadísimos de cementu que fixenon desapaecer las veigas más fértiles. Ya l.levántanse xigantes eólicos qu’espantan los páxaros, los animales en xeneral ya tamién a la xente, a la qu’emburrianon antias ya agora pa los barrios de la ciudá.