La nuesa bretona

Bretaña yía más qu’un rincón del continente: yía un capítulu enteiru de la hestoria del mundu. Escenariu de guerra, tierra de barcos celtas, patria d’héroes decisivos pal devenir d’Europa. Va unos anos peregrinéi a la costa d’Armor pa ver la casa d’Ernest Renan, al que más almiro cuanto más lu l.leo. Nestos tiempos revueltos d’identidá debatida, qué recomendable yía l.leere la sua obra “¿Qué yía una nación?”. Nel.la Renán destrúi los funestos prexuicios supremacistas que viven nel fondu del debate. Renán naciera en Trèguier ya resulta que tamién nesa zona nacíu Jeanick Yvonne Le Men Loyer, la profesora que van seis anos terminóu la sua impresionante obra “Léxico del leonés actual”. En tamién seis volúmenes axuntóu las palabras pañadas no patrimoniu l.lingüísticu.

Namás converséi una vez con esta mucher ya dende aquel.la séi que yía una bretona que chegóu aiquí ya quedóu con nós, namorada del arte. Ser de Bretaña siempres yía una cousa significativa, porque yía un país que tien resonancia na nuesa memoria coleutiva. Pa la xente avezada a la tierra seca Bretaña representa, por contraste, las imáxenes del verdor del augua. Pa los que nacimos en val.les estreitos ya d’iviernos fríos, cuando los montes tán cubiertos pola nublina nostálxica, Bretaña yía l’arquetipu que tien un parentescu con nós, una afinidá qu’a lo mechor yía difusa, pero siempres fonda.

Comentóume daquel.la Jeanick que tien una casa en Bretaña, a onde va cuando yía quien a faelo. Nun conozo esa casa, pero seguro que tien cerca una puente melancólica tapada pola yedra. Tamién habrá un cementeriu semáu con esas cruces que terminan clavadas no corazón. Ya nun faltará una ilesina xunto a la que los cabal.los salpican la mañana. Bretaña, la nuesa tierra querida: algo nueso hai nel.la, como l’arca de madera noble onde guardamos l’alcordanza de la familia. Ya del arca salen hestorias maravillosas que difunden lo mechor del ser humanu: la l.lienda bretona del amor, del honor ya de la xusticia. En Bretaña ya en Cornual.les atopéi you la fantasía del orixe: la tierra onde nos prestaría, un día, reposar. Cruzar las folas de la mar, escuitar los versos de las sirenas ya superar las oucas de la playa, pa suminos nel paisaxe de la humedá, fuente de la vida.

Nun séi si se fixo un homenax a Janick ya nun séi si los homenaxes son buena cousa. Pero estas palabras sí son cousas buenas: son palabras xunidas agora non pola lóxica del repertoriu académicu, sinón pol impulsu del poder, amable, de la l.lingua viva. Quiérsete, Janick, quierérente los que tienen el suenu de siguir pañando la herencia de las palabras.