L’eclipse ya la ilusión

Siendo nenu, prestábanme más bien los comics, ‘cuentos’ dicíamos nós, con un aquel d’aventura ya violencia, como «El Capitán Trueno» ou «El Jabato». L.leíamos mesmamente comics de guerra, como «Hazañas bélicas». Pero había tamién dalgún momentu pa Tintín, el xenial rapaz que taliaba los paisaxes del mundu atopando soluciones. El l.librín de Tintín que más me prestóu foi aquel tituláu «Tintín ya’l templu del sol», guapísima hestoria del pequenu héroe ya Milú pol mundu de los incas.

Alcuérdome de la imaxe de Tintín presu ya amenazáu polos carceleiros. Pero viera antias el pequenu periodista un papelín escritu onde se faía nuncia de qu’a tal hora de tal día diba vese un eclipse total de sol. Aproveitóu Tintín esta información ya profetizóu que’l sol, gran dious de los incas, diba escurecese a la hora qu’él dixera. Al faese la nueite pola mor de la l.luna, los incas asustánonse ya pensanon que Tintín yera tamién un dious ya salvóuse. Algo asina paez que fixera Colón conos aboríxenes americanos, anque esta ocurrencia «avant la lettre» colombina del Tintín l.literariu referíase a un eclipse l.lunar. L’astronomía foi una ciencia mui cultivada nas viechas civilizaciones, por valir pa las cousas práuticas de l’agricultura. Entós, el mundu de los eclipses conozse cuantayá. Pero mesmamente en sitios onde se conocían muitu bien los eclipses como cousa física, la mentalidá popular fixo ya imaxinóu bien de mitos ya l.leendas tocante al escurecimientu del sol por encubrilu la l.luna. Pensábase qu’un ser malinu atacaba al sol ya, entós, dalgún mal diba venire. En xeneral, que pol día se fixera de nueite víase como l’avisu de dalguna desgracia. Muitos autores, encesos polo muitu qu’estas creyencias asustaban a los homes, fixenon escritos pa que la xente perdiera la l.lercia a los seres divinos vengatibles: l’eclipse del sol yera namás la solombra de la l.luna na Tierra. Agora las cousas yían abondu distintas. Los animales siguen afuxendo del eclipse, pero la humanidá velu anguanu como un motivu que nun tien nada que vere cona angustia. Más bien paez que l’eclipse yía una razón pa l’al.legría, una promesa de que na vida tamién hai cousas buenas. Yía verdá que yía namás un fenómenu físicu, pero tamos cansos de tanta monotonía de la conceición científica del universu que cualquier cousa que paez desviase de «lo de siempres» abre la ventana a la esperanza. Como la xente que vive onde nun hai nieve enxamás: si un día ven los faloupos, viven momentos felices. Yía posible que no nuesu inconsciente más fondu siga alitando la ilusión de que, un día, seremos quien a vere un milagru.