EL MOLÍN DEL TIEMPU

L’aquel telúricu de los montes

La creación literaria puede descubrir lo telúrico de la montaña.R. G.-QUEVEDO

Creado:

Actualizado:

Tocóume estos días l.leere una novela guardada va unos meses. Cono outuenu ya conas fuechas mariel.las por ondequiera, chegaba’l momentu más aquel.lu pa l.leere «Cordillera», un l.libru escritu por Marta del Riego. Esta escritora yía de La Bañeza, una vil.la que nun conozo más que de pasu. Pero unu de los pasos feitu por mi fuera especial: taban celebrando los carnavales (antruejo), pero con una naturalidá que me sorprendiera dafeitu, porque yeran unas celebraciones que nun venían de reconstrucciones etnográficas del pasáu, sinón de la continuidá como cousa natural. La prohibición de la carnavalada fixo muitu dañu ya desanicióu la fiesta más importante en bien de zonas campesinas y ganaderas, como yía’l casu del «antroidu» del mieu pueblu, onde yera la fiesta por escelencia del anu: comere a farta, mascarase, asustar a los nenos, faere estrueldu. En La Bañeza nun fonon quien a quitar esta celebración ya la xente siguíu corriendo l’antroidu.

La Bañeza yía tierra chana, pero Marta del Riego escribe una novela onde puei vese que conoz bien los val.les altos alredor de lo que se chama xeneralmente la «Cordillera Cantábrica», especialmente na zona del Alto Sil, Babia ya L.luna ya la parte simétrica más al norte. Descubrir un calabre fai que la temática seya policíaca, pero hai tres protagonistas que vienen de cómo s’alcuentra agora la cultura de la zona. Hai una osa defendiendo la sua estirpe, un estudiosu pola protección d’esas especies en peligru ya tamién tenemos a una mucher que representa la tradición cultural ya se chama «Nidia». Yía mui interesante esti nome, que vien del l.latín NITIDUS. Yá na l.lingua l.latina significaba «bril.lante, guapu, con buen xeitu». Referíase tamién a lu que tien aspeutu de manteiga ya yía fèrtil. Alcontramos na nuesa l.lingua tous estos matices: una nena cona piel blanca, pero non pola enfermedá, sinón pola salú ya la guapura, un monte blancu ou resbalosu pola nieve, etc. El personaxe de «Nidia» yía la naturaleza peneirada pola cultura humana.

Prestóume esta novela ya nun yía porque use palabras en pal.luezu ou porque trate cousas de las que you escribí con pasíón va tiempu, porque you metía tamién osos pensatibles ya outra clas social: los mineiros. L’autora resuelve muitu bien una cousa difícil de faere: poner nas suas páxinas el «coru», el elementu enigmáticu de la traxedia griega. Inxertar na l.literatura d’anguanu aquel.los elementos misteriosos del mundu clásicu merez más l.linias de comentariu. Pero, ai, chenóuse la muxega ya nun hai sitiu pa más farina. Entós, el molín tien que parar ya asperar outru día de molienda.

Cargando contenidos...