La felicidá en Rousseau

Anque non la más conocida nin la más influyente, una de las oubras más guapas de Jean-Jacques Rousseau yía aquel.la na que cuenta los pensamientos ya pantasías del caminante solitariu («Rªveries d´un promeneur solitaire»). Nesti l.libru póstumu, el pensador suizu va dexando surdir los sous xeniales pensamientos mientras va caminando polos sendeiros que cruzan los praos ya los outeiros. Viendo las flores ya las plantas de los bardiales va Rousseau samarguchando en sí mesmu, metiéndose na fondura de la sua alma, más al.lá de la simple lóxica ya dexando volar la sua mente.

Cuenta qu-™un día, al escurecerín, mientras diba por un sendeiru tuvo un accidente: un perru grandón tiróulu pal suelu ya quedóu él ail.lí inconsciente, achenu al mundu esternu. Sentía correr la sangre pol sou cuerpu, pero paecía que nun yera la sua sangre. Vía la verdura de los praos ya la creciente escuridá del cielu, pero nun yera él el que miraba, sinón una entidá impersonal. Nuna palabra, Rousseau sintíu nesi momentu la pérdida de la sua individualidá, dexóu de ser él mesmu, una cousa concreta. Pero lo que más destaca l-™autor yía qu-™aquel.los momentos fuenon d-™un gran placer, d-™una felicidá infinita como nunca enxamás sintiera na sua vida.

La idea de que la felicidá naz al perder la individualidá del you, al convertinos en parte de la realidá infinita nun yía nueva: apaez esti pensamientu yá en culturas mui viechas ya estremadas de la nuesa. Sí yía nueva la forma d-™espresar esa idea, maxistral en Rousseau. Pero you creo que tamién polos sendeiros del Sil, crucigramas de praos ya montes, somos quien a sentir la felicidá más grande ensin tener un accidente: basta dexar que polos nuesos güechos entren los freisnos, los xardones, los ablanos, los regueiros ya las nubles del monte. Tamién asina podemos perder la nuesa individualidá ya sentinos flotando na indolora totalidá del mundu.