La fiesta del outuenu

L’outuenu de 2015 entamará’l sou l.labor de tirar las fuechas de los árboles el próximu 23 de septiembre a las 10 horas ya 21 minutos, según la nuesa hora oficial. Termina asina outru branu, un branu más. Un branu que vieno como siempres: chenu de calor, fiestas ya, tamién, trabachu.

Como siempres cuando xira’l molín de la hestoria humana, esta parte caliente del calandariu val pa festexar a dioses ya santos. Especialmente na nuesa tierra los branos dedícanse a las vírxenes. Porque anque hai muitos santos del pueblu, mandan las fiestas de los sitios que tienen por patrona a la Virxe María.

Ya hai dous momentos fundamentales nesti calurosu branu en cuantas al cultu a esa pequena diosa que yía la Virxe María. El 15 d’agostu, cuando mui bien de xente celebra los cultos marianos ya tamién esta parte braniega del mes de setiembre, especialmente’l día 8. La Virxe del Caminu, la Virxe de Gracia en Mansilla, la Virxe de… Pero tou chega ya tou pasa. Agora entramos en tiempos con menos sol ya menos fiesta.

L’outuenu. Esa época de tristura, cuando se barrunta yá la friura del iviernu. Cuando quedan entodavía recordatorios del sol qu’enciende la tierra. L’outuenu de la mirada melancólica a lo que vieno ya de pequena esperanza polo que va siguir viniendo. L’outuenu de los montes que cambian de color como p’abrigase porque los días menguan ya las nueites crecen. L’outuenu: esa estación imprescindible pa cumplir el ciclu vital. L’outuenu, necesario pa que la vida nun quede rota antias de tiempu.