el molín del tiempu
Chesterton
Güei cúmplense 142 anos que nacíu l’escritor Gilbert Keith Chesterton, autor de muitas obras ya de mui diferente clas: novelas, ensayos, biografías, artículos… Chesterton naciera en Londres el 29 de mayu ya la sua obra tuvo l.lectores a esgaya n’Europa ya n’América.
Yía inevitable referise a la cuestión de protestantismu ya catolicismu, porque pa escándalu de muitos británicos Chesterton terminóu convirtiéndose al catolicismu ya na sua actividá l.literaria militóu como católicu.
Chesterton foi un maestru de la novela policiaca, como puede vese naquel.la obra maestra chamada «L’home que fuera Xueves». Tamién, por supuestu, nos l.libros que recuechen los cuentos que tienen como protagonista al padre Brown. Esti cura yera tan ridículu en cuantas al sou xacer a primera vista como aliel.lu ya intelixente p’alcontrar soluciones que los outros nun yeran a ver. Chesterton dexónos más de cincuenta hestorias del padre Brown.
Son muitas las cousas positivas que puen dicise de la obra de G. K. Chesterton. Sicasí, you destacaría’l sou sentidu del humor, la sua guapa ironía, que recuerre tola sua obra, dende los relatos hasta los testos críticos. Mesmamente’l títulu de dalguna de las suas obras yía irónicamente radiante, como, por exemplu, «Grandísimas cousiquinas» («Tremendous trifles»), onde se recuechen artículos de prensa chenos del xeniu ya de la bril.lantez d’esti autor.
Todas estas obras son bien prestosas pa l.leere nestos tiempos cambiantes de güei: l.libros vivos ya chenos d’intelixencia.