Baxo la rueda

Cúmplense güei 140 anos del nacimientu, en Calw, del escritor alemán Hermann Hesse. El día 2 del mes de Santa Marina de 1877 naciera l’autor d’obras tan l.leídas como “Siddharta”, “El l.lobu estepariu” o “El xuegu de los abalorios”. A mí préstanme especialmente de Hermann Hesse los sous cuentos, nos qu’hai una especial capacidá p’alcontrar el misteriu de la guapura que tien la estética l.literaria. Poucu a poucu, como separtando las yerbas d’un campu que nun conocíamos, la manu d’esti escritor va describiendo la tensión poética que da vida a la sua narración.

Sicasí, la hestoria d’esti autor que más m’impresionóu de cuantas l.leí yía la titulada “Baxo la rueda”. Cuéntase cómo un nenu, Hans, tien muita capacidá inteleutual ya yía la esperanza del sou padre cuando entra a estudiar nun internáu. La crueldá d’una educación que’l nenu sufre termina desaniciando la vitalidá de Hans, al que va afogando la dureza de los estudios.

Aquel.lo que fuera una esperanza va convirtiéndose, entós, na frustración ya’l fracasu. La muerte de la madre ya, más tarde, la brutalidá de los profesores p’afitar nel alma infantil los l.libros ya las teorías acabanon convirtiendo al nenu nuna figura menguante.

Xeneralmente veise esta obra como una crítica a la severidá educativa. Pero va más al.lá: el carru de la vida, cargáu de xente amenazante, tien una fuerza bardina ya, dalgunas veces, pasa por encima de los más sonces, que terminan baxo las ruedas.