calabazas

La calabaza tien un aquel de frutu esforme. Yía un fenómenu, un cousu raru. Nun sabemos por quéi, pero despierta la calabaza no maxín muitas suxerencias ya asociaciones. ¿Será que tien muitu abalumbu? ¿Será la forma caprichosa de la sua periferia? ¿Será la sua invitación a la cintura femenina? Será, será, será… El casu yía que la calabaza nun queda enxamás indiferente pa los nuesos güechos.

Axúntase la calabaza a la idea de negación. Recibe calabazas l’estudiante que suspende l’asignatura. Tien tamién calabazas el mozu galantiante al que nun quier la moza.

Na tradición de los nuesos val.les verdes del norte la calabaza yera protagonista del Día de Difuntos. You alcuérdome de vere puestas calabazas afuracadas que nos asustaban a los nenos. Solía sere cousa de mozos asustar a los nenos conas calabazas de los muertos. Un vezu propiu de tola cultura atlántica ya céltica europea.

Agora chegan las calabazas d’América, envueltas en papel de Halloween. Una tradición americana, pero una costume que l.levanon irlandeses ya outros pueblos cona colonización. Nós matemos las guapas cousas de la nuesa cultura ya dexemos morrer las nuesas tradiciones. Pero agora, cuando réplicas d’esas tradiciones chegan a nós na bandexa bril.lante del imperiu americanu, convertímoslas outra vuelta en cousa nuesa. Sicasí, nós primeiro. Sicasí, fuera una celebración nuesa que se faía tolos anos n’alcordanza de la tristura final. Una celebración que vuelve a nós como un boomerang. Quiera Dios que nun nos manque.