carrasconte

El l.lunes pasáu, cuando’l molín del tiempu marcaba la mitá del mes d’agostu, foi un gran día de fiesta. En val.les ya pueblos celebróuse’l día de la Virxen. Ya unu de los sitios onde más bril.lara la celebración fuera no Santuariu de Carrasconte, testigu d’una tradición que vien de los más fondu de la prehestoria.

La práutica relixosa foi siempres, amás de la sienda interior, un actu social, d’identidá coleutiva. Ya esti aspeutu social veise muitu bien no Santuariu de Carrasconte. El templu ta puestu en Babia, pero amira pa L.laciana. Ya como siempres pasa, la frontera afita la oposición ya l’afirmación de los coleutivos: diferencia ya xuntura entre babianos ya l.lacianiegos.

Mientras se faen na ilesia los ritos más íntimos, al l.lau ya al aire l.libre dase la celebración social ya económica con puestos de distintu xacer: cousas de tradición popular, dulces, navachas, etc.

La romería de Carrasconte sigue con vitalidá porque nuevos vezos faen revivir las tradiciones. La xente, que vien a veces de l.luenxe, chena aquel.las campas. Agora con coches a esgaya, antias con fileras de carros, como aquel.la mucher de la qu’escribía Eva González: «Sil arriba, garradina a un estandochu camina la pelegrina».

Envuelta nos secretos de la hestoria, capaz d’humanizar ya dar sentidu a un paisaxe que sería ermu sin los deseos del home, la ilesia sigue marcando’l pasu del tiempu. Ya, mientras, tou lu vixilan un güechu enigmáticu ya una cruz: la Piedra Furada.