La purificación universal
El mes de febreiru yía fríu, anque crez la l.luz. Yía un mes l.loucu, porque igual vien con nieve que chega con cielos estenos, ensin nubles. Pero simbólicamente febreiru tien una fuercia importante: yía’l mes de la purificación, de la purga, del tiempu de quitar la contaminación del mal.
Comprobóuse esto yá’l pasáu día dos, cuando en muitos sitios celebróuse “La Purificación”, tamién chamada “Las Candelas”, porque en muitas culturas antiguas la idea de purificar simbolizábase con velas ya antorchas: signos de la l.luz del bien, pero tamién del l.lume abrasador que queima los seres peligrosos.
La idea de pureza yía de las más fuertes de la cultura humana, dende los pueblos más antiguos hasta’l presente. Tamién nas novelas ya películas futuristas ya de ciencia ficción apaez siempres la obsesión pola purga, pola necesidá de desaniciar al impuru. Sige viva esta idea no nuesu inconsciente coleutivu ya a cualquier amigu nuesu paciente ya tolerante podremos velu un día queimando a los que tienen el mal.
La idea de la purificación afitóuse ya vive entovía con nós, ya siguirá. Por supuestu, siempres tuvo que vere conos papeles o roles de xéneru, onde la mucher padez bien de tabús: la sangre menstrual fai impura a la mucher pa fabricar el pan, pa faere morciel.las ya chourizos, pa dir en barcos, pa cultivar flores ya plantas...
Celébrase en febreiru la purificación, pero alcontrábase tamién en cualquier día del anu. En muitas partes d’Europa, en naciendo un nenu, la madre quedaba impura cuarenta días. Yera la famosa cuarentena, cuando la mucher nun podía entrar na ilesia hasta que, pasáu esi tiempu, venía al templu ya recibíanla’l cura ya la xente pa presentar al sou nenu. Alcuérdome con emoción de la fuercia d’aquel ritual, que presenciéi siendo bien nenu. No pórticu de la ilesia de Palacios esperábase a la madre, que venía engalanada con roupa nueva ya trayía al nenu no cuel.lu, tamién con roupa blanca. Alcontraba entós el cariñu del pueblu, porque entrambos pasaban una frontera peligrosa. Yera tamién una costume ritualizada según la tradición hebrea ya cristiana: de la Nueitebuena al dos de febreiru van cuarenta días.
Pero la raíz fonda de la purificación va más al.lá d’una creencia concreta, yía un condicionante cultural universal. Tamién son universales los exorcismos, igual los d’agora que los d’antias. You presencéi bien de veces aquel.los exorcismos que se faían na pila de piedra de la ilesia de Palacios: l’augua purificadora na cabeza tierna del nenu, pa defendelu del mal. Los nuesos antepasaos vivían asustaos. Nós tamién, anque faigamos como que non.