Kawabata, Mishima, Murakami

Unu de los l.libros primeiros que merquéi na mia vida yía’l d’un escritor xaponés: Yasunari Kawabata. Yera you mui nuevu ya Kawabata recibiera’l Premiu Nobel, en 1968. Nun lu merquéi na l.librería, sinón por corréu, gracias a aquel «Círculo de Lectores», que nos trayía a Palacios xoyas impresas. Aquel.la novela l.levóume a un mundu mui distintu de la l.literatura a la que you taba avezáu.

El títulu del l.libru yera «Una grulla en la taza de té» ya yía una gran obra, un testu estraordinariu de prosa poética. Agora suel editase col nome de «Mil grullas», que se refier a una premonición positiva ya a la creencia de que faer mil grullas de papel salva de la enfermedá. La obra tien metáforas guapísimas ya descubre un universu chenu de matices en cousas que paecen prosaicas ya vulgares. Por exemplu, la ceremonia del té, que pa mi nun tien importancia denguna, apaez como un ritual chenu de simbolismu ya de bril.lantes alusiones a la esistencia. La solombra espectral del padre ya las suas antiguas amantes agobian al protagonista, Kikuji. Cuando entra no complicáu mundu del erotismu alcuéntrase cona realidá de los celos, del resentimientu ya de las distintas caras del amor, como’l placer, la pureza, la guapura.

Unos anos más tarde chegóume la noticia del suicidiu de Kawabata ya impresionóume muitu. Anque non de manera abierta, nas suas páxinas resuena’l l.lamentu pola occidentalización de Xapón, metafóricamente representada na trivialización del ritual del té. Veise muitu bien la oposición abierta a Occidente n’outra obra xaponesa estraordinaria, la que guardo xunto a l’anterior ya se titula «Caballos desbocados», de Yukio Mishima. Esta merquéila nuna l.librería ya nel.la cuéntase, xunto a guapas escenas poéticas del paisaxe, la rebelión pa volver al Xapón tradicional, rebelión que termina en fracasu, como l’autor de la obra, que fixo l’harakiri en 1970.

Alcuérdome d’estos dous l.libros entrañables al enterame del premiu que vien de recibir Haruki Murakami, del que me prestóu muitu «Los años de peregrinación del chico sin color», como diz el volume en castel.lanu, que me chegóu va poucu, agora gracias a Internet. Asusañando de dalguna manera las suites de Liszt, Murakami fai un viaxe pola finalidá del dolor ya de la vida, entamando pol trauma de ver que los sous amigos lu abandonan ya él nun sabe por quéi. Murakami tien tolos vezos ya rasgos de la l.literatura occidental, aiquí nun tamos yá nel país del crisantemu ya la espada. El tiempu pasa ya desanicia’l pasáu. Pero una gran cultura como la xaponesa, cuando se sume, súmese siempres con sufrimientu ya muerte.