La mucher l.lobu
Pola parte del Cáucaso recuéchese la hestoria d’una mucher que se convierte en l.lobu. Yera porque fixera dalguna cousa mala ya entós sufre un castigu que yía que vien un espiritu malinu, un espíritu que chega con una pel.lecha de l.lobu na manu ya diz:
— Ponte esta roupa nueva.
En poniéndose la pel.lecha de l.lobu, la mucher poucu a poucu va fayéndose más l.loba en tolos aspeutos. L’encantamientu dura siete anos ya entama tolos días al chegare la nueite, pero al amanecerín de Dios la mucher quítase la vistimenta de l.loba ya faise humana outra vuelta. La mucher pasa esos anos calechando polas nueites ya desapiechando las puertas de las casas ya comiendo nenos, igual los de la sua familia que los de las outras parentelas.
Esta creencia forma parte d’un conxuntu de tradiciones que se concretan n’Europa nun cuentu popular afitáu polos países bálticos ya tamién n’outras zonas. Como suel pasare, nesta ocasión la mala yía una madrastra que nun soporta la felicidá d’una fichastra yá casada ya entós embruxa ya cambia a la sua propia ficha pola fichastra. La fichastra queda convertida nun l.lobu ya anda pol monte, anque tolos días garra al sou fichu pa l.levalu a onde los árboles. Ail.lí la mucher l.lobu quítase la pel.lecha ya da la teta al sou nenu.
El xenru de la madrastra, o seya, el padre del nenu, termina sospechando ya sigue al sou fichu al monte ya reconoz a la sua querida mucher verdadera ya descubre la conspiración de la malvada bruxa madrastra. Entós, sigue los consechos d’un magu ya acércase a onde ta mamando’l sou fichu ya queima la pel.lecha de l.lobu, recuperando asina pa siempres la madre embruxada la forma humana. Pa la madrastra ya la sua ficha suplantadora nun hai compasión por parte de la xente del pueblu.
Nuna versión d’esti cuentu pañada no pueblu bercianu de Burbia la tradición oral diznos que nuna casa echanon a la nena a los l.lobos, pero el.la, en vez de comida pa el.los, fíxose una mucher l.lobu. Vuelve más tarde pa la casa ya métese no desván, comiendo a tola xente que xube ail.lí. Cuando quita la pel.lecha de l.lobu, el.la vuélvese humana, hasta que la pon outra vuelta. Pero un día un mozu valiente xubíu al desván ya alcontróu a la moza en forma de mucher guapísima. El mozu garróu la pel.lecha que taba quitada ya tiróula al l.lume, abazando darréu a la moza hasta que la pel.lecha queimóu dafeitu. Entós, cuando yá nun quedaba dengún pelu de la pel.lecha, el.la quedóu desencantada ya casánonse. Yía muitu probable que fueran felices, más felices que los homes l.lobu, homes que, según contará’l molín del tiempu, tenían un final más triste.