La cabana fantástica

Tolas cabanas yían guapas. Naquel.la ol.la que forman los montes más viechos, na parte más fondera del val.le, siguen en pía mui bien de cabanas, cono marmul.lu del augua que sal mansa ya cuasi xelada de la esencia de la tierra. Todas yían guapas, adormecidas si las miraas dende fuera, pero chenas de vida na parte de dientro. La sua vida concéntrase no interior ya esa fuerza interna namás yía quien a salir al compás del fumu qu’afuxe del l.lume pa xubir al cielu.

Yeran los días del outuenu, del tiempu seruendu, cuando lo moradores de la braña axeitaban yá las suas cousas pa baxar al pueblu ya dexar, con educación ya xentileza, que las nieves taparan aquel territoriu por unos meses. Pero la nieve tamién tenía’l sou protocolu, ya, en chegando la tenrura de la primavera, el.la tamién dexaría, educada ya respetuosa, el sitiu pa que la xente xubiera outra vuelta. Vendría, entós, el verdor a los árboles ya l’al.legría de los tenrales, las magüetas ya los homes ya las mucheres, que darían una nueva forma a aquel.la zona l.luenxe del mundu.

Tolas cabanas yeran guapas, pero yéralo especialmente una d’el.las. Nun yera fácil identificar cona intelixencia por qué aquel.la cabana yera especial, qué yera lo que la faía distinta, pero’l sentimientu que l.levamos nel alma dicíanos con claridá qu’aquel.la yera una cabana diferente. Asina que fuimos pa contra el.la ya abrimos la puerta, que nun taba pechada. Ail.lí taba’l sou amu, axeitando las cousas pa baxar ya pasar outra mitá del anu na sua casa del pueblu. Había muitu que faere, especialmente cono ganáu, porque las pertenencias personales yeran poucas ya non delicadas. Sicasí, atrevímonos a perguntar a aquel home por qué aquel.la cabana tenía dalgo especial.

Constestóunos con una hestoria evidentemente fantástica. Un día, díxonos, va muitísimu, muitísimu tiempu, cuando Alog, el nuesu antepasáu, vieno de las guerras imperiales, al chegar a la sua cabana atopóula esbarrumbada: la piedra taba prieta, la madera queimada, el teitu aborráu ya no suelu.

Alog xuróu odiu eternu a los l.ladrones. Pero Alog yera tamién un sabiu. Deprendiera la ciencia del poder de las piedras ya las estrel.las. Orientáu pol firmamentu, pañóu piedras que tenían la cualidá de la maravil.la, de manera que truxo con él la piedra que s’espanta si toca’l l.leite, el morrillu que chupa la sangre, la pedriquina que vive na cabeza de la culuebra, la chábana qu’atrapa los cristales. Ya tamién truxo la piedra más importante: la qu’espanta ya mata a los enemigos.

—Yía una piedra roxa. Puximos un cachín en cada cabana. Pa cuando vengan los invasores, que yá tán cerca.