La pastorada

Amirando pal mapa de L.lión veise que pola parte este ya, especialmente, pola sudeste conservóuse muitu tiempu una tradición de fondu interés etnográficu: la Pastorada, tamién chamada Corderada. La Pastorada yía un fenómenu mui estudiáu ya hai abonda bibliografía feita nos últimos anos. Yía una representación teatral que, según muitos autores, vien a sere una continuación del teatru que se faía pola Edá Media nos ambientes populares ya rurales. Yera tradicional faere esta representación cuando la Misa del Gal.lu, pero podía faese tamién n’outras fiestas del ciclu de la Navidá, hasta’l día de los Reis Magos.

Faíase la Pastorada xeneralmente na ilesia del pueblu ya los personaxes más importantes yeran los pastores, que dan nome a la ceremonia ya que tenían como xefe al ‘rebadán’ (rabadán). Pero, amás de los pastores, yía tamién imprescindible la Virxen, San Xosé, el Nenu Dios...

La representación faíase al mesmu tiempu que se contaba ya cantaba la hestoria del Nacimientu, dramatizándola dende’l famosu decretu d’empadronamientu hasta la chegada de los Reis Magos siguiendo la Estrel.la ya, tamién, la maldá d’Herodes.

Yeran vecinos del pueblu los que faían esta dramatización ya un mantenedor de la tradición cuidaba de que nun se perdieran los diálogos. La trasmisión yera, lóxicamente, oral, pero, gracias a dalgunos testos escritos conservaos, los investigadores puen conocere anguanu cómo yeran, polo menos en parte, los diálogos que se cantaban o recitaban.

El rasgu esencial de la Pastorada yera ser la ofrenda d’una cordera que faían los pastores al Nenu Dios. Al estudiar antropolóxicamente los rituales relixosos veise que predomina la busca ya’l perdón del poder divinu ofreciendo a este poder una contribución que convierta en favoratible l’actitú de la divinidá pa la xente.

La tradición de faere poemas populares que s’alcuerden del Nacimientu alcuéntrase en muitos países ya recuéchense mui bien de testos poéticos populares nos que se cuenta la marcha de pastores al portal pa festexare l’acontecimientu. Pero lo que fai más interesante la Pastorada yía que los mesmos pastores del pueblu dramatizan la hestoria trasmitida oralmente ya potencian asina’l ritual fayendo una representación teatral.

Como suel pasar, paradóxicamente, agora que desapaez la tradición yía cuando más s’investiga. Tamién paradóxicamente, cola desapaición de la tradición hai mui guapas reconstrucciones. Ya, a veces, la recuperación faise na ciudá, cousa impensable antiguamente, de manera que la Pastorada puei refaese na mesma Catedral, un fenómenu de muitu interés pal análisis antropolóxicu.