La isla bonita

Alcuérdome güei d’aquel.la canción “La isla bonita”, que diera muita fama a Madonna cuantayá, van cuarenta anos. Anque yía una l.letra cuasi namás n’inglés, el títulu puxlu Madonna arraimente en castel.lanu: “La isla bonita”. Si tuviera que ponere na nuesa l.lingua estas tres palabras podía you escribire “La isla guapa”, anque, acordias cona lóxica del idioma bien podía sere “La isl.la guapa”, palatalizando al nuesu xeitu ya cona chamada “che vaqueira” esa “l” que s’atopa no centru del nome.

Pux el vídeu del cantar ya veio a Madonna identificándose conos símbolos de la cultura l.latina en xeneral: la guitarra, la vida tranquila, la ilesia colonial, el rosariu. Ya concretamente escenas a esgaya nos barrios de Nueva York: imáxenes cálidas, el bail.le de la xente feliz. Madonna fai una idealización del xeitu caribeñu de vivire, ensin priesa, cono son de la salsa, la siesta ya un aquel de palabras n’español que la xaxan (‘your spanish lullaby’). La mesma Madonna manifestóu que yera un homenax a aquel ambiente que conociera en Nueva York: la isl.la guapa sería un mundu ideal, un paraísu. La verdá yía que las isl.las convirtiénonse nun tópicu pa visualizar una utopía, un mundu ideal. Supónse que la isl.la, arrodiada d’augura, nun ta contaminada ya guarda la felicidá primera. Yá na Atlántida de Platón apaez un mudu ideal, que terminóu perdiéndose. No sieglu XVI Tomás Moro escribiera “Utopia”, que yía’l modelu d’outras civilizaciones imaxinadas ya que nun tenían los nuesos defeutos. Un sieglu más tarde Francis Bacon escribiera “La Nueva Atlántida”, onde apaez outra vuelta una isl.la, Bensalem, rixida polos principios de la ciencia ya gobernada dende la Ca Salomón, que l.logra mechorare la vida de la xente. Yía bien interesante qu’Aldous Huxley escribiera en 1962 “La isla”, contrapuntu ideal al mundu distópicu de “Un mundu feliz”. Hai muitas isl.las utópicas na l.literatura universal ya menos na l.literatura española, anque tamién puei atopase’l casu interesante d’una península utópica chamada “Sinapia”, austral ya antípoda d’Hispania, mechorando los defeutos ibéricos. Desconozse al autor d’esta obra (“Descripción de Sinapia”), que según dalgunos yía l’ilustráu Campomanes. El cantar de Madonna nun yía un tratáu filosóficu nin l.literariu, yía namás una canción, pero fai apoloxía d’un mundu feliz siguiendo los tópicos de la isl.la de los suenos. Igual tous guardamos la nuesa “isla bonita” dientro de nós. Paeme que you tamién la tengo, anque, amirando pa mi, paezme que, en pisando la playa, you buscaría los hurrios ya las brañas, las ol.leras ya los montes de bedules.