Alcordándonos de los mouros
Los humanos vivimos no l.linguax ya faemos el mapa espacial alredor de nós poniendo topónimos, o seya, nomes a las plazas, a las fuentes, a los praos, a los montes, etc. Cuando una l.lingua vive, chena conos sous nomes las cousas d’alredor. Cuando muerre una l.lingua, outras palabras d’outra l.lingua vienen a ponese onde antias taban los viechos topónimos, los viechos nomes de los sitios. Pero fai falta tener en cuenta que los topónimos son las últimas palabras que se pierden ya muitas veces sobreviven baxo formas modernas.
Outramiente, los topónimos son interesantes por muitas razones. Vienme agora a la tiesta un topónimu que yía mui frecuente por tola parte noroeste de la península ibérica: refiérome a los topónimos que tienen que vere conos «mouros». Sitios como «El Pozu del Mouru» o «La Cueva del Mouru» asócianse entovía güei en muitos l.lugares a l.leendas de tesouros ya enigmas. Pero ¿qué mouros yeran esos? Hai distintas teorías ya denguna yía definitiva, anque you creo na que diz que los mouros de los topónimos nun se refieren a los árabes, sinón a los nuesos antepasaos. Los antepasaos siempres dan un poucu de pánicu ya nos tiempos de l’amenaza musulmana los pueblos cristianos alcontranon esi nome pa referise al pasáu misteriosu ya un poucu peligrosu de los espíritus ancestrales. Formánonse asina hestorias fantásticas que nos dicen qu’en tiempos mui antiguos por aquel.los sitios esos antepasaos yeran «mouros» que vivían ya trabachaban nos l.labores cotidianos.
No pueblu onde you nací hai muitas hestorias de mouros que vivían en cuevas misteriosas que se bifurcan de manera infinita. Mouros que dexaban la marca del sou pía nuna piedra fantástica, que cruzaban el monte por un sendeiru estreitu pa machar el centenu ya por caminos secretos diban al ríu pa moler el granu. Outramiente, la mia familia que vivía na ciudá tuviera un pisu na «Era del Moro» ya cuando you diba a la sua casa perguntábame por esi nome tan especial. Tocante a esa zona urbana consérvanse l.leendas medievales con aires de romántica evocación de xudíos ya mouros que vivían idílicamente al pía d’un gran molín, xugando al axedrez ya escondiendo cousas d’ouru ya plata. Xente sabia conoz bien la hestoria real d’esta zona. You, humildemente ya ensin outra base que la intuición, pergúntome si esi nome nun será una alcordanza de la l.leenda entovía más antigua qu’imaxinaba los primeiros antepasaos de nós. Outra realidá ya outras fantasías vinienon a sustituir la viecha ficción, pero quedóu la palabra, como fragmentu últimu d’aquel gran mitu orixinariu, que marcóu penas, cuevas ya sendeiros.