El pan máxicu

Tamién la cultura del pan mudóu sobremanera. Si antias fuera l’alimentu por escelencia, agora’l pan va dexando de ser una cousa básica pa convertise nun complementu. De feitu, la xente nueva avezóu yá a comere ensin pan.

Pero fuera tan importante’l pan nos sieglos pasaos que na memoria de la xente tán guardaos los muitos rituales máxicos que se faían alredor d’él. La cousa entamaba yá al semar, dexando cayer na tierra augua, augua que pasara antias polos ritos de la ilesia pa tener un poder fertilizador. Como tou aquel.lu básicu pa la vida, el pan tenía un aquel de sagráu, de manera que nos dicían a los nenos que yera una cousa mui mala echar el pan al suelu. Cuando nos daban pa merendar un cantiel.lu o una recha (con manteiga) enxamás podíamos tiralos ya, si por dalguna razón lo faíamos, tenía que sere dando antias un beisu a la miga ya a la corteza.

El pan acompaña los pasos de la esistencia. Cuando la xente diba a la casa onde naciera una nena o un nenu, l.levábase muitas veces dalgún pan p’ayudar a la familia onde había una boca nueva. Nas bodas tradicionales, aquel.las que se faían na casa de la novia, nun faltaba dalguna fogaza especial ya simbólica. Nas fiestas del branu tamién había un pan, como aquel que tantas veces viera you repartir por San Roque, unos bol.los que guardaban el pequenu milagru de que nun s’acaronxaban.

Ya tamién el pan yera importante no momentu de la muerte. Un gran hestoriador, Adolfo Fernández, estudióu los ritos del pan al morrer dalguién del sou l.lugar, Matalavil.la. Yera la Caridá de los difuntos. Namás faese pública la muerte del home o mucher del pueblu, ponse en marcha’l ritual. Va a la casa del muertu unu de cada familia del pueblu ya repártese por requidura (‘requir’ significa dicir el nome por orde de l.lista) un pouco de vinu ya un bol.lu de pan de mediu quilu más ou menos. El representante de la familia diz ‘¡Dios lo haya perdonado!’ al recocher el pan ya’l vinu. Depués d’unos cuantos rezos, el representante l.levará entrambos alimentos pa los outros miembros de la sua casa. Esti ritual faíase tamién en tiempos pasaos al celebrase’l cabudanu. Sicasí, na muerte d’un nenu nun hai Caridá, porque yía un alma pura.

La mesma feitura del pan yera un procesu ritual. La mucher ponía’l furmientu, que faía un l.labor misteriosu: l.lograba que naciera una sustancia nueva, un ser distintu, el sustentu de la casa. Al amasar ya al enfornar, pronunciábanse fórmulas máxicas. You escuitéi muitas, pero alcuérdome d’una que resume l’espíritu del pueblu: aquel.la que pide a San Xustu, que, pol bien de la casa, «de lo poucu saque muitu».