La familia del molín
El molín yía güei un poucu narcisista ya quier dedicase a la contemplación de sí mesmu ya de la sua familia. Hai bien de molinos. Como outra muita xente, you conocí primeramente los molinos d’augua, la que chegaba del ríu por una canal ya cayía al rodenu. El rodenu daba vueltas ya las muelas molían los granos de centenu ya dexaban cayer la farina.
Pero había outros molinos, molinos d’outra clas. Por exemplu, hai un molín que se pon al pía del mar ya aproveita las mareas pa ser quien a mover las muelas. Hai molinos que nun funcionan con augua, sinón cona fuerza de los animales, tamién cona de los brazos humanos: hailos que precisan que se dea vueltas al rabil, a la manivela pa quitar la caxina qu’envuelve’l granu de dalgunos cereales. Outramiente, terminanon chegando los molinos eléctricos ya outros más.
Hai outra clas de molín mui importante: aquel.la de los que mueve’l vientu, los que respiran gracias al aire. Húbolos dende cuantayá, pero agora ganan los modernos, los que son xigantes en chanos ya montañas. Son los que terminan colonizando los sitios de los pueblos p’apoderase de la última propiedá de los l.lugares, del respiru, del últimu síntoma de vida que quedaba naquel.los val.les.
El molín foi amigu del home dende la chegada de l’agricultura. Los arqueólogos alcuentran de continu piedras redondas conas que s’aproveitaban los granos que daban las plantas. No mundu indoeuropéu, por exemplu, la raíz *mel— yía’l principiu de palabras pa chamar al molín, como ‘mill’, ‘Mühle’, ‘moulin’, ‘mulino’.
Tanta importancia na vida diaria tenía que faere tamién trascendente’l molín na memoria ya na cultura de la xente. Un molín roxu puei terminar siendo l’iconu d’una gran ciudá, como’l Moulin Rouge de París. Outru molín de vientu puei quedar como modelu del xigante escontra’l que peleamos pa l.lograr un mundo ideal, como se cuenta na hestoria del amigu de Sancho. Muitas veces yera’l molín un situ especial onde s’axuntaba la xente ya onde la molinera, igual un poucu candonga, podía sere bien airosa, como dicía aquel.la canción de Schubert, la que se chama ‘Die schöne Müllerin’ (La molinera guapa). Escribiérala precisamente Wilhelm Müller (Guillermo Molineiru, si fixéramos una innecesaria traducción).
La importancia del molín yera tamién ritual. En Roma empolveirábase la cabeza del animal sacrificáu cona ‘mola’ (que significa tamién ‘farina’, outra palabra de la familia del molín), por eso la ofrenda yera una ‘inmolación’. En cuantas a onde nós, falta poucu pal branu ya pa que, por San Roque, se faiga un pan milagrosu, el pan que nun acaronxa ya val pa curar l’andancia.