El pozu máxicu de Santa Nonia

Los procesos nos que la xente cambia los dioses por outras figuras divinas son muitu interesantes. Sicasí, en muitos casos las viechas ideas siguen vivas embaxo de las nuevas formas.

Los nuevos creyentes entaman la denuncia de que los viechos dioses son namás ídolos ya que las creyencias antiguas son «superstición» o «bruxería». Asina lo fixenon los cristianos cuando acabanon conas creyencias tradicionales del Imperiu. Diz la l.leenda qu’eso fuera lo que fixo San Marcelo, un centurión que denuncióu la mentira de Roma ya por mor d’el.lo quedóu condenáu a muerte por filu d’espada. La sentencia cumplíuse en Tánger, demostrándose asina lo globalizáu que yera l’Imperiu Romanu o, a lo mechor, el poder fantásticu de la l.leenda. O entrambas cousas.

Tamién matanon al restu la familia. La mucher de Marcelo yera Nonia ya entrambos tenían unos cuantos fichos. Nonia chamábase asina probablemente porque naciera la novena na sua familia. Mui amurniada, como yía natural, pola muerte de la sua xente, al vese sola, ya namás con un fichu que quedaba, pidíu al cielu, mientras choraba, que s’apiadara d’el.la ya del nenu ya que pudieran axuntase conos demás martirizaos de la familia. El deséu pudo cumplise: hubo un cataclismu, abríuse la tierra ya Nonia ya’l fichu dexanon el mundu terrenal sumiéndose na fondura de la tierra antias de xubir al cielu. Al mesmu tiempu, naquel sitiu quedóu un manantial ya una l.laguna, un pozu d’augua máxica que curaba los males. La xente diba al pozu pa metese nel augua ya tamién a bebere de la fuente pa sanar. Al mesmu tiempu que s’aproveitaban del augua máxica, la xente l.levantantóu una ilesina pal cultu a la santa.

Yá nun hai pozu. La ilesina pasóu por muitas modificaciones, siempres con poucu respetu pal templu, qu’agora s’alcuentra prisioneiru ya afogáu pola especulación urbanística.

You creo que la l.leenda del pozu de Santa Nonia yía una reconstrucción o asimilación del mitu precristianu de la mucher que s’escuende nuna l.laguna pola mor de dalgún encantamientu. Esa mucher, chena de guapura ya d’aspeutu cuasi divinu, tien poderes máxicos ya, anque tamién puei sere un peligru, en xeneral reparte riqueza ya cousas fantásticas a los que van a las suas auguas sanadoras.

La primera vez que sentí you’l nome de Santa Nonia fuera cuando un grupu bien grande d’estudiantes entremos na Biblioteca puesta na vía dedicada a la santa. Díbamos pa informanos en ficias de faere unos trabachos que mandara un profesor. Yéramos muitos ya revolucionemos aquel sitiu, anque you l.logréi un l.libru sobre los hititas. Pero esa yía outra hestoria del molín del tiempu.