El Sol ya outras utopías

Ayer, día 5 de setiembre, cumpliénonse 452 anos de que los güechos de Tomasso Campanella vieran por vez primera la l.luz del Sol, estrel.la que pa él fuera’l símbolu de la xusticia ya de la perfeición.

Calabria, sur d’Italia. El mozu Campanella buscaba outra vida mechor ya sentía qu’había cousas nuevas. Yera mentira lo que dicía la Ilesia oficial: en realidá, la Tierra da vueltas alredor del Sol. Ya’l Sol yía’l manantial de la sabiduría. Rebelóuse escontra’l poder de los españoles n’Italia ya castigánonlu con 27 anos de calabozu. Ail.lí tuvo’l suenu d’una sociedá ideal, onde reinaría’l bril.lu del dios Sol. Esta yera la quimera del gran pensador Campanella: una utopía, la perfeición que nunca chega, la que nun s’atopa en dengún l.lugar.

Na solombra de la cárcel escribíu en 1602 “La Ciudá del Sol”, obra onde describe una sociedá perfeuta, puesta no cume d’una montaña. Esta ciudá tenía no centru un gran templu redondu dedicáu al Sol ya alredor l.levantaríanse siete murias circulares consagradas a los planetas, siguiendo la güelga del sistema de Galileo. La sociedá igualitaria que buscaba Campanella yera una teocracia totalitaria: había un xefe supremu que, representando al dios Sol, tenía un poder absolutu.

Para Campanella el Sol era el símbolo de la justicia y de la perfección. ROBERTO G.- QUEVEDO

You prefiero la mia utopía: el paraísu a la mia medida, un mundu nuevu ensin l.lugar pa la tristura ya onde nun hubiera’l conceutu de la guapura nin de la inxusticia, porque tou sería guapu ya xustu. Nun faltaría el ríu, tampoucu un árbol ya you podría poner la manu nun manantial cercanu que va serenu baxo la l.luz del sol. Pero, bueno, confieso que tamién soi a soportar dalguna utopía de los demás ya hasta siento un poucu de simpatía polos utópicos de tolos tiempos.

Sicasí, muita xente desconfía de la utopía, que cuez xeneralmente na intelixencia d’aquel.los que marchanon de la realidá: la mente del fichu de campesinos que va a un conventu o la del que vive del trabachu de los outros. La sociedá ideal que naz na mente d’un profeta puei tener a veces una crueldá que se paez a la cama d’aquel Procusto de la mitoloxía griega. Procusto sometía a los visitantes que venían a casa a las dimensiones de la sua cama pa invitaos. Procusto yera sanguinariu: cortaba’l cuerpu de los que yeran más grandes ya estiraba a los más pequenos. Asina, los humanos axustábanse siempres a la medida de la cama. La verdá yía que val más una nueite prestosa, con guapos suenos propios ya bien de placer, que sometese a la fantasía d’un paranoicu. Mechor un árbol, un ríu ya un manantial que cuerra serenu a la l.luz del día. Ya meter el nuesu cuerpu ail.lí, nel augua esfrecida baxo’l sol.