Encantu del mundu salvaxe

H ai dalguna xustificación pa pensar que’l mundu salvaxe, aquel.lo que nun pertenez a la cultura, yía una cousa buena. Por exemplu, caminar polas montañas ya cruzar los ríos son argumentos p’asegurar que’l mundu ideal yía’l mundu non contamináu pola civilización. Asina pensamos, tamién, cuando vemos las l.lagunas altas de Babia o caminamos polos val.les de los Picos d’Europa o sentimos l’augua del ríu pasar polos salgueiros. Estas esperiencias despiertan en nós l’espíritu rusonianu, o seya, inspiráu en J.-J. Rousseau.

You, igual que la mayoría, tengo amigos rusonianos. Ya estos piensan: cuanta más naturaleza, mechor ya cuanta más civilización, peor. En realidá, esta forma de ver las cousas yía una falsedá, porque lo que chamamos naturaleza yía una cousa que yá filtráramos antias polos güechos de la nuesa cultura. Nun somos quien a ver la naturaleza pura, vémosla namás gracias a las nuesas categorías culturales.

De tolas maneras, más al.lá de la teoría, la verdá yía que la moral derivada del espíritu rusonianu favorez que cuidemos lo natural ya desconfiemos de los l.logros de la civilización. Yía peligrosu sacralizar las consecuencias de la cultura. Un poucu d’escepticismu viennos bien, porque sabemos que la civilización pue terminar siendo un monstruu qu’acaba conos sous creadores.

Rousseau, entós, tenía razón en parte. La vuelta a lo salvaxe, a lo natural, pue valinos pa frenar los desmanes del aquel depredador de la razón civilizada. Ya yía un ciertu bálsamu pensar que yera más feliz, ¡ai!, el salvaxe (axetivu inxustu pa referise a las culturas antiguas) con un tatuax na cara. Una caricatura, sí, pero la caricatura suel ser la fórmula usada pol pensamientu.

Rousseau yera un cínicu ya na sua vida particular el sou comportamientu éticu yera bien l.lamentable. Abandonóu a los sous fichos, por exemplu. Sicasí, los sous escritos son xeniales ya xeneralmente seducen al que los l.lee. Igualmente, anque sepamos que lo de lo natural nun yía verdá, tenemos que siguir creyendo qu’algún día seremos quien a recuperar esa esencia de nós que perdimos, que nos fixenon perder por culpa de las instituciones corruptas. «Tou sal puru de las manos del Creador, tou acaronxa por culpa de las manos del home».

Anque nun seya asina, eso yía lo que sentimos cuando una imaxen de la naturaleza fai que nos alcordemos de qu’esa, esa sí, yía la auténtica felicidá qu’andábamos buscando. Hai dientro de nós un molde que cuadra cona frescura del ríu polos salgueiros, la guapura de las auguas yerbosas de la babiana L.laguna de las Verdes o las praderas onde pousan las cabanas d’una braña.