La ougüecha de San Patriciu

A l chegare a la mitá de marzu barrúntase la primavera ya hai celebraciones importantes, como las idus de marzu del día 15, cuando en Roma l.levaban la «ougüecha de Xúpiter» pol centru la ciudá hasta la fortaleza del Capitoliu, onde la sacrificaban. De las idus de marzu quedóu na memoria coleutiva que César nun fixo casu del adivín ya murríu brutalmente, cousa redundante. Alcordámonos tamién de las famosas palabras súas a Brutu antias de la muerte: «Tamién tu, mieu fichu».

Las idus de marzu fueran fatales pal escritor Howard Ph. Lovecraft, que tuviera poucu reconocimientu mientras vivíu, pero que nos últimos xiros del molín del tiempu va teniendo cada anu que pasa más xente favoratible, que lu reconoz como unu de los grandes autores de la l.literatura. Lovecraft murrirera’l 15 de marzu de 1937 ya la fantasía ya’l terror alcuentran nél un clásicu insuperable. ¿Insuperable? Non. Alcuentro superior la hestoria de la ougüecha de San Patriciu, exemplu de fantasía, eso sí, amable, non terrible.

Güei yía’l día 17 de marzu ya celébrase la fiesta de San Patriciu pa festexare la identidá irlandesa. Diz la tradición qu’esti santu convirtiera a Irlanda nun país católicu ya fixo qu’afuxeran las viechas creencias, anque nun hai seguranza de qu’esto fuera asina. De San Patriciu préstanme muitu las hestorias que se contanon de la sua vida. Porque, por exemplu, esplicaba’l misteriu de la Santísima Trinidá (tres personas ya un Dios namás), a la xente cona comparanza d’un trébole: una sola plantina ya tres fuechas difrentes. ¡Comparanza con fortuna abonda!

Pero la hestoria de la ougüecha (asina escuitéi you chamare a la ouvecha) yía realmente una fantasía sublime. N’Irlanda hai muitas ougüechas, como las que you viera polos montes ya corradas del mieu pueblu paciendo, mientras asperaban a los l.lobos. Un paisanu un día arroubóu una ougüecha de los vecinos, l.levóula pa casa, matóula, esfol.lóula ya, finalmente, comíula. San Patriciu escandalizóuse ya repitíu muitas veces que’l ladrón que comiera la ougüecha tenía que pagare a los sous amos. Nun había forma de descubrire quién fuera’l qu’arroubara ya manducara la ougüecha, asina que San Patriciu cansóu ya un día na ilesia dixo dende’l púlpitu:

— ¡Quiera Dios que’l l.ladrón que comíu la ougüecha, agora mesmu ya delantre de tous, se ponga a berrare igual que la ougüecha que comíu!

Ya, efeutivamente, el l.ladrón quixo cal.lare, pero una fuerza sobrenatural fixo que berrara como la ougüecha que l.levaba dientro ya la xente quedóu empaponada. Cuenta la hestoria que nadie arroubóu más ougüechas por aquel.los pueblos d’Irlanda.