Los ximielgos

Dalgunos l.libros de John Le Carrée, amás de clásicos del espisonaxe, yían tamién testos de calidá l.literaria abonda. Alcuérdome agora d’un testu del l.libru tituláu, na edición castel.lana, «El peregrino secreto». Los protagonista del fragmentu yían «los ximielgos». Chámanse «ximielgos» los harmanos que nacen no mesmu partu, pero tamién tien outru significáu esta palabra: los ximielgos yían dúas piecinas simétricas que zarran el puñu de la camisa al vistise con dalguna elegancia. Estos ximielgos, que puein tener dalgún símbolu, úsanse agora namás en dalguna celebración.

Cuéntase nesta hestoria cómo una familia conservadora británica tenía na cárcel un fichu, delincuente dafeitu. El sou padre visitábalu cada poucu hasta qu’un día’l fichu dixo: —Nun vengas más a veme. Tou estu yía una comedia, una tapadera. En realidá you soi un espía británicu destináu en Moscú. Pero faen como que soi un criminal pa que nun sospeche naide. Asina que nun vengas, porque si lu faes pones en peligru’l mieu trabachu secretu. Soi invisible. De nós, de los espías, alcuérdanse namás una nueite del anu, cuando faen una fiesta nun castiel.lu nas afueras de Londres ya ail.lí reconocen la nuesa dignidá. Esa nueite pónenme roupa elegante, un traxe, ya l.levo unos ximielgos guapísimos. El padre quixo vere aquel.los ximielgos, preba de que dicía la verdá, pero’l fichu dixo: —Non, guárdanlos el.los, tou yía mui secretu. Un día muerre’l fichu delincuente nuna griesca de presos. Los padres quieren sabere si’l sou fichu yera de verdá un héroe ou namás un criminal ya van a una entrevista con un xefe del espionaxe británicu, con George Smiley. Smiley nun quier dicir la verdá pa non chenar de tristura lu que queda de vida d’aquel.los padres viechos. Pero el.los quieren vere la preba, la preba de que’l sou fichu yera un héroe. Ya como la preba yeran los ximielgos, Smiley, por caridá, sacóu del caxón de la sua mesa unos xemelgos que fueran un regalu de la sua mucher. Aquel.los padres marchanon con dous premios: unu yeran los ximielgos pa zarrar los puños del sou fichu; outru premiu, unas memorias pa morrer mechor. Quixo la casualidá qu’un día, al entrevistar you por cuestiones etnográficas a dalguién del mieu val.le, fuera a dare cono harmanu ximielgu d’un rapaz mineiru al que detuvieran por espiare pa Moscú. Agora, al contare esta hestoria, axúntanse los dous significaos de la «ximielguez»: por un l.lau, los ximielgos de los qu’escribiera Le Carré ya, por outru, un harmanu ximielgu. Una familia sutrumida pola policía ya un espía de casa. Esta rara xuntura oblígame a contare cómo fuera la cousa.