Seguranza

Diz el reflán que “Mayu fríu, anu de muitu fríu”. El reflaneiru, esi saber contradictoriu ya popular que xustifica toda posibilidá, aplícase muitas veces al pronósticu del tiempu.

Pa nós agora’l tiempu tien que ver, na ciudá, conos planes de fiesta ya vacación pal fin de semana, pero nel mundu campesín de siempres l’ansiedá por conocer el tiempu futuru yera una necesidá que venía del l.labor agrícola ya ganadeiru. Unos días de chuvia ou unos días de calore podían significar probeza ou riqueza, trabachos ou vida más descansada.

Esta ansiedá por saber el tiempu atmosféricu de mañana fixo que los paisanos calcularan muitas previsiones: si la nuble bien d’esti monte, si sopla l’aire del norte, si por mayu fai muitu fríu…

Na nuesa tierra espardíuse dalguna publicación pa que los paisanos conocieran el tiempu futuru. Estas publicaciones l.logranon a una sorprendente difusión en Portugal, onde exemplares de “Borda d’Água” ou “O Seringador” cheganon a tener una gracia ya un humor bárbaru por demás.

El nun saber el futuru asústanos ya d’esti sustu vien el deséu de conocelu, dominalu ya controlalu. Asina nacen los reflanes sobre’l tiempu que va a faer. Asina tamién foi como se formóu’l mundu de los rituales máxicos, de las creencias na bruxería ya nos poderes sobrenaturales. Nun nos basta que’l futuru seya buenu: necesitamos tamién la seguranza de que lu conocemos nel presente.