Los inocentes

Contaba Don Antonio Machado, na sua valoratible obra Juan de Mairena, que’l pedagogu auténticu fuera Herodes.

Más al.lá de la ironía ya l’esceuticismu de Machado respeuto a lo que val la ciencia de la educación, el Día de los Inocentes trainos a la cabeza unas cuantas cousas. Una yía l’alcordanza del símbolu de la crueldá. Cuanto más débil ya miedosu yía’l poderosu, más cruel yía tamién. Herodes, Nerón ya outros muitos reis ya príncipes son símbolos mitificaos de gobernantes xabaces ya sanguinarios.

Mañana celebramos esa parte de la humanidá, los nenos, que sufren la hestoria de los adultos: los que nun tienen culpa denguna suelen pagar los crímenes de los culpables verdadeiros.

Pero tamién hai un Día de los Inocentes, peme que menguante, que celebra la broma ya la burl.la del orde institucionalizáu: el 28 del mes cabeiru del anu yía cuando se festexa l’engañu a los inxenuos ya infelices.

Paez que las inocentadas yeran l’al.legría de la xente probe. Esta sociedá d’agora, más rica ya consumista, yá nun s’alcuerda de los monigotes de papel nel l.lombu, nin d’aquel.las monedas de 50 céntimos con un furaquín no mediu. Con un filu o tanza podíamos engañar al que s’agachaba creyendo qu’alcontrara una moneda de la suerte. Al.legría fácil de l.lograr, qu’agora paeznos más auténtica. Yía l’alcordanza.