Pueblos valeiros

Na griesca, mui viecha, ente l’home ya lo que chamamos la naturaleza, van últimamente perdiendo las fuerzas de los montes, de los val.les, de los ríos ya de los animales. En xeneral, porque nun siempres yía asina, los nuesos montes van quedando ermos, los val.les pierden la guapura ya los ríos chénanse de plásticos ya de cousas acenantes.

Na nuesa tierra va yá tiempu que ta entamando un cambiu hestóricu muitu grande. Esti cambiu naz d’una desgracia: el despoblamientu de los nuesos pueblos ya vil.las. Las casas quedan valeras de xente, la mocedá marcha pa la ciudá, polos pueblos yá nun hai voces de nenos. La xente nun vive mal agora porque los viechos tienen buenas pensiones, pero en poucos anos faltará la sangre na zona rural ya asina chegaráse a la muerte d’un universu cultural ricu ya estraordinariu. Un universu onde bebía la cultura en xeneral, porque los pueblos yeran el complementu del mundu urbanu.

Al nun haber pueblos, la ciudá va ser un poucu más bárbara: faltará-l.ly el raigañu, la fuente, la semiente. Una vida onde los homes ya mucheres namás viven nos pisos ya nos rascacielos sedrá una vida mui distinta. Yá nun chegará l’aire de las chimeneas encesas, nin el sabor del miel, nin el frutu cultiváu con amor ya sabiduría ancestral.

??Yía verdá que siguirá habiendo poblaciones fuera de la ciudá, pero sedrán imitaciones antroidiegas, pantasmas qu’asusañan aquel pasáu memorable.