El curquiel.lu

Diz el nuesu reflán que “En terminando San Xuan, el curquiel.lu para de cantar”. Porque’l curquiel.lu, el nuesu simpáticu páxaru qu’al.legra las primaveras, entama’l sou cantar tranquilu ya persistente cuando termina l’iviernu, pero cal.la al chegar el branu. Pa depués de San Xuan yá cuasi nun se siente cantar a esti paxarín. Ya por Santa Marina paez que nun queda nin rastru d’él.

Resulta que yá tamos terminando la primavera. Cuasi sin danos cuenta, vemos que los días crecienon ya son muitu l.largos. Tamos cerca yá del solsticiu de branu ya paez que’l molín del tiempu acelera las vueltas del rodenu. Paecía que tábamos emprincipiando esti anu pero la verdá yía que tamos chegando yá a la sua mitá.

Tenemos, entós, qu’aproveitar el tiempu ya salir polos campos pa sentir el famosu “cu-cú” agora que la naturaleza tien una fuerza grandísima. Ya asina seremos quién a saber más cousas. Porque’l curquiel.lu yía adivín. Dizse que cono sou “cu-cú” va contándonos cuántu tiempu falta pa las cousas importantes. Por exemplu: p’alcontar trabachu, pa la boda, pa la muerte, pa momentos decisivos de la nuesa vida.

Anque la fema pon los güevos nos niales achenos, el curquiel.lu tien un aquel de guapura ya de cousa amable. Pero tien tamién esti páxaru un aquel de misteriu ya de poder peligrosu. El curquiel.lu tien una cara escura: la que guarda los secretos del nuesu futuru.