la nuesa alma

Esti branu l.lévanos el molín del tiempo al anu 1819. Mañana, día primeiru del mes d’agostu, fairá 197 anos que naciera en Nueva York Herman Melville, autor d’una obra variada: ensayu, poesía, narrativa.

Sicasí, tola obra de Melville queda anubrida pol sou gran l.libru: “Moby Dick”. Esta estraordinaria hestoria yía yá un clásicu de la l.literatura universal. Al principiu nun tuvo muitu éxitu, pero depués de morrer l’autor l.logróu’l reconocimientu que merecía.

Esta novela, amás de danos muitos datos sobre la pesca, tien un significáu mui fondu ya en muitas direiciones.

El protagonista, Ishmael, empieza la sua vida como marineiru nun barcu balleneiru chamáu “Pequod”. La tripulación yía muitu variada, pero’l que destaca yía’l xefe: el capitán Ahab.

Ya quién yía Ahab? Un capitán que tien una pata artificial, feita con un güesu de cachalote. Porque a Ahab comiéra-l.ly la pata una terrible ballena blanca, chamada Moby Dick. Esta ballena yera’l terror de los mares, pero yera, sobretóu, la bestia enemiga d’Ahab, que buscaba venganza.

La meta, l’oxetivu del barcu balleneiru yera cazar ballenas, pero la meta del capitán Ahab yera acabar cono sou enemigu, el que-l.ly comiera la pata.

?Tous somos Ishmael: vemos las obsesiones de los outros como absurdas. Pero tous somos un poucu Ahab: dedicamos la nuesa vida a destruir a quien nos mancóu, al que mancóu la nuesa alma.