Alma Rusa

Güei cúmplense 81 anos de la muerte del escritor rusu Maxim Gorki, cousa que pasóu un día dieciochu del mes de San Xuan de 1936.

Gorki fuera tola vida un escritor incansable ya tampoucu cansóu enxamás de denunciare la probeza de la clas humilde. La riestra de las suas obras yía muitu grande, pero seguramente unu de los sous l.libros más famosos yía “La madre”, onde se describe l.literariamente cómo va texéndose la revolución conos filos de la xuventú ya de la l.lealtá de la madre.

Como yía frecuente nestos casos, el mesmu Gorki resultóu víctima de la revolución. Pero las revoluciones ya la política van pasando ya lo que queda yía’l paisaxe, lo que permanez yía’l pueblu. A la Siberia del zar siguíu la Siberia de Stalin ya asina sucesivamente.

Na estraordinaria l.literatura rusa, de la que Gorki yía parte, hai un alma, la chamada “alma rusa”. Un alma que yía una variante de la cultura europea.

Más al.lá de las clasificaciones de los bloques militares ya de la estratexa política, Rusia yía un componente del espíritu européu. De los Urales a Portugal l.late un mesmu continente cultural. Por esto yía polo que l.leendo a Gorki, a Dostoyevski, a Tolstoi ?somos quien a identificanos dafeitu conos símbolos ya los personaxes del universu rusu, rural ya urbanu. El probe, la inxusticia, la madre que nos dibuxan estos escritores son iguales que las figuras del nuesu retablu simbólicu.