Hurriu

Hurriu, horriu, horru: construcción nos val.les del norte, pa defendese de la humedá ya de los ratos. La palabra vien de Roma (“horreum”), onde había hurrios inmensos, grandes depósitos. Quedan restos a esgaya d’el.los no que fuera l’Imperiu.

Los nuesos hurrios son humildes, pero fuenon necesarios. Por supuestu, tamién son guapísimos. L.leo nun documentu mui antiguu que l’hurriu romanu taba destináu “ad custodiam pretiosarum rerum” (pa guardar cousas preciosas). L’hurriu romanu tamién podía sere pequenu ya valir como graneiru, bodega, trasteiru, cuartu. Igual que’l nuesu hurriu d’agora.

Sicasí, l’hurriu yía dalgo más: yía arca, caxa, baúl de fortuna. Igual l’hurriu tien agora namás dalguna pataca, dalguna panocha, dalgún granín de cereal o dalguna ferramienta probe, pero será siempres un santuariu de la memoria.

You nací nuna casa con hurriu. El cuartu onde abrí los güechos al mundu taba pegando a un gran cofre máxicu. El cofre yera l’hurriu de la casa de la buela. Tolos que nacienon o vivienon xunto a un hurriu comprenderán que tien un significáu especial chegar a la vida al l.lau d’un tesouru asina.

¿Tengo dereitu a sentime feliz por nacer nun cuartu que s’alcontraba al pía d’un hurriu? Paezme que sí, porque fui quien a sentir dende los primeiros días cómo l.latía’l corazón un nenu a la par qu’aquel.la xoya, un sitiu especial onde poner las cousas que queremos. Ya anque agora nun nos alcontremos cerca, la imaxinación entovía nos dexa guardar ail.lí las cousas preciosas nuesas.