El pesimista
Piréstame chegar al centru de la ciudá atravesando’l ríu Bernesga por una puntiga, una pasarela, como un puentín colgante que da a Papalaguinda. Ail.lí crúzase ya ponse unu na Avenida de Lancia, que tien alcordanzas ancestrales. Chégase entós a la qu’entovía agora dalguna xente chama la Plaza Elíptica, nome muitu guapu por aquel.la alcordanza, entovía más ancestral, que l.leva a la elipse, figura xeométrica que fai’l nuesu planeta nel universu físicoquímicu, onde la Tierra xira incansable.
El casu yía que caminaba you l’outru día cerca d’esta guapa Plaza Elíptica, la que tien agora outru nome oficial, ya fixéime na fuentina que tuviera onde la estatua de Guzmán. Mientras vía ya sentía los chorros d’augua, alcontréime con un amigu al que nun vía cuantayá. Fuera compañeiru míu d’estudios, pero la vida l.levóunos por caminos bien estremaos. Prestóunos venos outra vuelta ya entós la mechor cousa que podíamos faere yera dir a tomar una cerveza a dalguna de las cafeterías del que chamaban, nun séi si sigue agora esta denominación, el “Barrio Italiano” (Nápoles, Sorrento, Don Carleone, etc.). Dalgunas d’estas cafeterías entovía tán en pía, outras cambianon ou zarranon. Esti viechu amigu yera de la mia edá más ou menos ya la imaxe que you guardaba d’él yera la d’una persona chena de fuercia vital.
Alcordándome d’aquel.la personalidá vitalista, sorprendíume por demás alcontralu en mui baxa forma en cuantas al ánimu. Nun entróu en detalles, pero resumía la sua vida como una riestra de casos de muita mala suerte, que daban como resultáu un fracasu. Anque reconocía los sous propios enquivoucos, el mieu amigu pensaba que yera la víctima d’una inxusticia. Hasta venía a dicire que la sociedá tenía una deuda con él ya paecíume tamién que quería faeme sentíme culpable de la sua vida torcida ya chena de tristura. El mieu amigu yera un pesimista.
En dexando al amigu ya siguiendo en direición al centru de la ciudá, retumbiaba na mi cabeza la sua conversación. Ya you pensaba si tendría aquel amigu dereitu a quexase polas xusticias qu’anubrían las memorias que guardaba de la sua vida. ¿Tienen los dioses dalguna deuda pendiente con él? ¿Dében-l.ly la naturaleza ya la realidá dalguna cousa al pesimista?
Alcordéime d’outros amigos pesimistas que tienen como un privilexu ya un signu de distinción sere asina. Hasta atopan no sou pesimismu un signu de superioridá ya mesmamente hasta d’intelixencia, como si los que nun somos pesimistas fuéramos un poucu fatos. Siéntolo, pero a mi paezme que nun yía asina: venimos d’una masa físicoquímica onde nun hai sitiu pa la culpa nin pa la deuda.